उमदी : संख (ता. जत) येथे व्हरांड्यात झोपलेल्या संतोष शिवाप्पा बिरादार (वय ४२) या महावितरणच्या कर्मचाऱ्याचा छातीत गोळ्या झाडून निर्घृण खून करण्यात आल्याची घटना शनिवारी मध्यरात्रीनंतर घडली.
खुनानंतर उमदी पोलिसांनी अवघ्या तीन तासांत छडा लावत महांतेश मल्लया स्वामी (३५, रा. दरीबडची, ता. जत), रोहित ऊर्फ नागेश बाळू जगदाळे (२२, रा. शंभर फुटी रस्ता, त्रिमूर्ती कॉलनी, सांगली) या दोघांना अटक केली. खुनाच्या नेमक्या कारणाबाबत तपास सुरू आहे. याप्रकरणी मृत बिरादार यांची मुलगी श्रवंती संतोष बिरादार (१६) हिने उमदी पोलिस ठाण्यात फिर्याद दिली आहे.
पोलिसांनी दिलेली माहिती अशी, दि. १० मे रोजी रात्री १२:३० ते १ वाजण्याच्या सुमारास संतोष बिरादार हे कुटुंबासह घराच्या व्हरांड्यात झोपले होते. त्यावेळी आरोपींनी पिस्तुलातून त्यांच्या छातीत दोन गोळ्या झाडल्या. भारनियमन सुरू असल्यामुळे परिसरात अंधार असल्याचा फायदा घेत आरोपी घटनास्थळावरून शेताच्या दिशेने पसार झाले. गोळीबारात गंभीर जखमी झालेल्या बिरादार यांचा जागीच मृत्यू झाला.
खुनाची माहिती मिळताच उपविभागीय पोलिस अधिकारी सचिन थोरबोले यांच्या मार्गदर्शनाखाली उमदी पोलिसांनी तातडीने तपास करत अवघ्या तीन तासांत दोघा हल्लेखोरांची माहिती मिळविली. आरोपी रोहित ऊर्फ नागेश बाळू जगदाळे हा संख-दरीबडची रस्त्यावर असल्याचे समजताच पोलिस उपनिरीक्षक बंडू साळवे, सिद्धेश्वर गायकवाड यांच्या पथकाने तेथे जाऊन त्याला ताब्यात घेतले.
चौकशीत त्याने महांतेश मल्लय्या स्वामी याच्यासह खून केल्याची कबुली दिली. त्यानंतर पोलिसांनी जाडरबोबलाद-माडग्याळ मार्गालगतच्या शेतातून महांतेश स्वामी यालाही ताब्यात घेतले. दोन्ही आरोपींनी गुन्ह्याची कबुली दिल्याचे पोलिसांनी सांगितले. मात्र, खुनाचे नेमके कारण काय? याबाबत गावात उलटसुलट चर्चा रंगली होती.
या कारवाईत पोलिस उपनिरीक्षक दिनेश घसाडे, पो.हे.कॉ संतोष माने, लक्ष्मण बंडगर, कावेरी मोटे, महादेव मडसनाळ, संजय पांढरे, परशराम देशमुखे, छाया बाबर, रेणुका कुंभरे, सोपान भंडे, सुदर्शन खोत आदींचा सहभाग होता. पुढील तपास सहायक पोलिस निरीक्षक संदीप कांबळे करत आहेत.
अंधाराचा फायदा घेत थेट छातीत गोळ्या
संख परिसरात सुरू असलेल्या भारनियमनामुळे घटनेवेळी परिसरात अंधार होता. याच संधीचा फायदा घेत आरोपींनी संतोष बिरादार यांच्या छातीत जवळून गोळ्या झाडल्या. कोणताही सीसीटीव्ही अथवा प्रत्यक्ष पुरावा नसतानाही उमदी पोलिसांनी अवघ्या तीन तासांत आरोपींना अटक केली.
सुपारी देऊन खून केल्याची शक्यता
संशयित रोहित जगदाळे हा सांगलीतील रेकॉर्डवरील गुन्हेगार आहे. त्याने सुपारी घेऊन साथीदाराच्या मदतीने खून केल्याची शक्यता पोलिसांनी वर्तविली. त्यानुसार पोलिस तपास सुरू आहे.
Web Summary : A Maharashtra electricity worker, Santosh Biradar, was fatally shot in Sangli. Police swiftly arrested two suspects, Mahantesh Swami and Rohit Jagdale, within three hours. The motive remains under investigation, with a possible contract killing angle being explored.
Web Summary : सांगली में महाराष्ट्र के बिजली कर्मचारी संतोष बिरादार की गोली मारकर हत्या कर दी गई। पुलिस ने त्वरित कार्रवाई करते हुए तीन घंटे के भीतर दो संदिग्धों, महांतेश स्वामी और रोहित जगदाले को गिरफ्तार कर लिया। हत्या का कारण अभी भी जांच के अधीन है, सुपारी किलिंग की आशंका जताई जा रही है।