जत बसस्थानकात सुविधांची वानवा

फोटो ओळ : जत बसस्थानकाची विजापूर गुहागर राष्ट्रीय महामार्गालगत असलेल्या जागेवर दक्षिण व उत्तर बाजूने अतिक्रमण झाले आहे.

लोकमत न्यूज नेटवर्क

संख : विजापूर-गुहागर या राष्ट्रीय महामार्गावर मोक्याच्या ठिकाणी जत एस. टी. आगाराची जागा आहे. येथे ‘बांधा, वापरा आणि हस्तांतरित करा’ उपक्रमातून (बी.ओ.टी.) अद्ययावत असे शाॅपिंग माॅलसह सर्व सोयींयुक्त बसस्थानक उभारावे. यासाठी आ. विक्रम सावंत यांनी पुढाकार घ्यावा, अशी अपेक्षा तालुकावासीयांतून व्यक्त होत आहे.

जत एस. टी. आगाराची विजापूर-गुहागर राष्ट्रीय महामार्गावर तसेच जत-शेगाव मार्गावर साडेचार एकर इतकी जागा आहे. या जागेवर सध्या मोठ्या प्रमाणात अतिक्रमणे झाली आहेत. यामुळे एस.टी. आगाराच्या बांधकामला अडचण निर्माण झाली आहे.

तालुक्यातील एकूण गावाचा विचार करत येथे सर्व सोयींयुक्त असे अद्ययावत बसस्थानक यापूर्वीच होणे अपेक्षित होते; पण याकडे लोकप्रतिनिधींनी गांभीर्याने लक्ष दिले नाही.

आ. विक्रम सावंत यांनी विशेष प्रयत्न करून जत येथील एस .टी. आगाराचे विजापूर गुहागर या राष्ट्रीय महामार्ग व मंगळवेढा व ऐगळी या राज्यमार्गावरील मोक्याच्या ठिकाणी असलेल्या जागेवर बीओटी तत्त्वावर अद्ययावत बसस्थानक उभे करण्यासाठी पुढाकार घ्यावा. तसेच सध्या ज्या ठिकाणी जत आगाराचे एस. टी. बसस्थानक व वर्कशॉप आहे. त्या ठिकाणी फक्त एस.टी.चे वर्कशॉप ठेवून एस.टी. बसस्थानकाच्या जागेवर बीओटीतून शाॅपिंग माॅलसह दुकान गाळेही बांधता येतील. यामुळे एस.टी. महामंडळाच्या उत्पन्नात मोठ्या प्रमाणात वाढ होईल.

चाैकट

कर्नाटकातील सुविधा पाहा

कर्नाटक राज्यातील इंडी, अथणी, जमखंडी ही सीमेलगतच्या तालुक्यातील सर्वच परिवहन विभागांतर्गत असलेली बसस्थानके अद्ययावत आहेत. कर्नाटकमधील या विकासकामांची दखल घेऊन आपण आपल्या बसस्थनकांचा विकास करावा, अशी मागणी नागरिकांतून होत आहे.