कृषी उत्पन्न बाजार समितीच्या आवारात अत्यावश्यक सेवेच्या नावाखाली सोशल डिस्टन्सचा फज्जा.
अशोक पाटील
लोकमत न्यूज नेटवर्क
इस्लामपूर : राज्यात संचारबंदी असतानाही आठवड्यातील सलग पाच दिवस रस्त्यांवर नागरिकांची वर्दळ असते. शनिवार, रविवारी वीकेंडला नागरिक घरात बसतील तर नवलच. या दिवशीही नागरिकांनी संचारबंदीला खो दिला आहे. रुग्णांना उपचारासाठी बेड नाहीत. अनधिकृत उपचार करणाऱ्या डॉक्टरांकडे कोरोना रुग्ण वाढत आहेत. त्यांच्याबरोबर नातेवाईक असतात. हेच नातेवाईक भाजीपाला, औषध दुकाने, रुग्णालय परिसरात बेधडकपणे वावरतात. त्यामुळे कोरोनाला आमंत्रण मिळत आहे.
शहरात कोविड केंद्रासह सर्व खासगी रुग्णालयांचे बेड फुल्ल असल्याने बहुतांशी रुग्ण आता आपल्या फॅमिली डॉक्टरकडे उपचार घेऊन घरीच थांबत आहेत. असे रुग्ण विविध तपासण्या करण्यासाठी लॅब आणि औषध दुकान परिसरात वावरताना दिसतात. त्यामुळे यांच्या माध्यमातून मोठ्या प्रमाणात कोरोना पसरत आहे. या रुग्णांवर पालिका, आरोग्य विभाग आदींचे नियंत्रण नाही.
राज्य सरकारने पहिल्या टप्प्यात कोरोनाची साखळी तोडण्यासाठी आठवड्यातील शनिवारी आणि रविवार या दोन दिवशी संचारबंदीचे आदेश दिले होते. या काळातही कोरोनाचा प्रादुर्भाव वाढला. त्यामुळे पंधरा दिवसांचा पूर्णपणे लॉकडाऊन करण्यात आला. तरीसुद्धा वीकेंडला नागरिक रस्त्यावर मोठ्या प्रमाणात दिसू लागले आहेत. या दिवशी तरी मेडिकल वगळता सर्व व्यवहार बंद ठेवावेत, जेणेकरून कोरोनाची साखळी तुटेल.
कोट
वीस दिवसांत रुग्णांच्या तपासणीत १०० ते १२० रुग्ण कोरोना पॉझिटिव्ह सापडले. यातील ९० टक्क्यांहून अधिक रुग्ण घरीच राहून औषधोपचार करत आहेत. उर्वरित कोविड केंद्रावर उपचारासाठी दाखल झाले आहेत. घरी उपचार घेणाऱ्या रुग्णांमुळे त्यांच्या घरातील नातेवाइकांना संसर्ग होऊ शकतो.
- डॉ. अतुल मोरे, इस्लामपूर