सांगली : ऑक्सिजनअभावी कोरोना रुग्णांचे मृत्यू होऊ नयेत, यासाठी ठाणे महापालिकेच्या धर्तीवर सांगली महापालिकेने ऑक्सिजन प्रकल्प उभारावा, अशी मागणी कोरोना रुग्ण सहाय्य व समन्वय समितीचे सतीश साखळकर यांनी केली आहे.
प्राणवायूचा (ऑक्सिजन) होणारा मर्यादित पुरवठा आणि त्यामुळे होणारी रुग्णांची गैरसोय टाळण्यासाठी ठाणे महानगरपालिकेने ऑक्सिजन निर्माण करणारे दोन प्रकल्प उभारण्याचा निर्णय घेतला आहे. त्या धर्तीवर सांगलीत ऑक्सिजन प्रकल्प उभारावा, असे साखळकर यांनी म्हटले आहे.
गडहिंग्लज (जि. कोल्हापूर) प्राथमिक आरोग्य केंद्रात ऑक्सिजन प्रकल्प उभारला आहे. सांगली जिल्ह्यातही प्राथमिक आरोग्य केंद्र, मिरज सिव्हील, सांगली सिव्हील व गरजेच्या ठिकाणी अशा पद्धतीचे ऑक्सिजन प्रकल्प उभे करण्यासाठी शासनस्तरावर प्रयत्न करावेत. सद्यस्थिती व भविष्यात जिल्ह्यातील रुग्णांचे ऑक्सिजनअभावी मृत्यू होणार नाहीत, यासाठी दूरदृष्टी ठेऊन लोकोपयोगी निर्णय घ्यावा. जनतेला दिलासा द्यावा अशी मागणी पालकमंत्री जयंत पाटील यांच्याकडे केली आहे, अशी माहिती साखळकर यांनी दिली.
कोरोनाची दुसरी लाट संपेपर्यंत राज्यात सरसकट ‘एचआरसीटी’ तपासणी सवलतीच्या दरात व्हावी. त्यासाठी शासनाने सुधारित परिपत्रक काढावे, अशी मागणी साखळकर यांनी केली आहे.
रेल्वेच्या बोगी आणून १०० बेडचे कोरोना सेंटर सुरू करावे. सांगली सिव्हील हॉस्पिटलमधील डॉक्टर आणि इतर आरोग्य कर्मचारी यांची नियुक्ती करावी, अशी मागणी सतीश साखळकर यांनी केली आहे.