सांगली : बुद्धीवर आधारित सांस्कृतिक आणि सामाजिक लोकशाही देणारे संविधान म्हणजेच देशाचा खरा धर्मग्रंथ असल्याचे प्रतिपादन प्रसिद्ध दिग्दर्शक डॉ. जब्बार पटेल यांनी केले. अंधश्रद्धा निर्मूलन वार्तापत्राच्या डॉ. बाबासाहेब आंबेडकर अभिवादन विशेषांकाच्या ऑनलाईन प्रकाशन कार्यक्रमात ते बोलत होते. ‘डॉ. बाबासाहेब आंबेडकरांचे विचार समजून घेण्याचा माझा प्रवास’ या विषयावर त्यांनी विचार मांडले.
ते म्हणाले की, प्रत्येक व्यक्तीला जगण्याचा हक्क देणारे संविधान हीच खरी जीवनप्रणाली आहे. डॉ. बाबासाहेब आंबेडकर यांच्यावर माहितीपट आणि नंतर चित्रपट बनविताना ते अधिकाधिक समजत गेले. त्यांना प्रत्यक्ष भेटलेल्या, सहवास लाभलेल्या व त्यांच्यासोबत कार्य केलेल्या व्यक्तींनी त्यांचे मोठेपण विविध अंगांनी सांगितले. सर्वसामान्य आंबेडकरी जनतेचे बाबासाहेबांवरील अलोट प्रेम व उत्साह अनुभवला. महिलांना बाळंतपणाची रजा देणारे, एम्प्लॉयमेंट एक्स्चेंज निर्माण करणारे, मजुरांना किमान वेतनासाठी आग्रह धरणारे बाबासाहेब काळाच्याही पुढे होते.
दरम्यान, या विशेषांकात डॉ. नागनाथ कोत्तापल्ले, अजय कांडर, डॉ. शरद भुताडिया, राजकुमार तांगडे, अलका धुपकर, भरत यादव, नरेंद्र लांजेवार आदींचे लेखन समाविष्ट आहे.
प्रास्ताविक संपादक राजीव देशपांडे यांनी केले. आभार व्यवस्थापकीय संपादक राहुल थोरात यांनी मानले.