प्राचार्य यांच्यावर कारवाईची मागणी, तासगाव शासकीय तंत्रनिकेतन येथील प्रकार, सीएचबी पद्धत ही भारतीय संविधान कलम १५(४), १६(४) च्या विरोधात : अमोल वेटम
लोकमत न्यूज नेटवर्क
सांगली : राज्यात कोरोना प्रादुर्भाव वाढत असल्याने शासनाने भरतीप्रक्रिया व परीक्षा स्थगित केलेल्या आहेत. यातच तासगाव येथील शासकीय महिला निवासी तंत्रनिकेतन येथे वारंवार त्याच उमेदवारांना ‘सीएचबी’ भरती अंतर्गत निवड केली जाते. यात अनुसूचित जातीच्या उमेदवारांना डावलण्यात येते, अशी तक्रार रिपब्लिकन स्टुडंट युनियनचे महासचिव अमोल वेटम यांनी डीटीई संचालक, महाराष्ट्र राज्य तंत्र शिक्षण मंडळ यांच्याकडे केली.
तक्रार पत्रात म्हटले आहे की, शासनाने सीएचबी भरतीस स्थगिती दिली. ही स्थगिती शासनाने उठवलेली नसताना परस्पर प्राचार्यांनी दि.२२ व २३ डिसेंबर रोजी सदर सीएचबी भरती केली. सीएचबी भरतीबाबत निवड केलेले उमेदवार, त्यांचे गुणमूल्यांकन, मुलाखत घेणाऱ्या प्राध्यापकांची नावे, भरतीबाबत शासनाचा आदेश, मागासवर्गीय विद्यार्थ्यांच्या निवडीबाबतची सर्व माहिती संघटनेने माहिती अधिकार कायद्यानुसार मागितली होती. ही जनहिताची माहिती जुजबी कारण देत नाकारली.
याबाबत दंडात्मक कारवाईसाठी राज्य माहिती अधिकाऱ्यांकडे तक्रार केली आहे. येथील भरतीप्रकरणी कारवाईची मागणी उच्च व तंत्र शिक्षणमंत्री यांच्याकडे रिपब्लिकन स्टुडंट युनियनने केली आहे.