सांगलीत नदीत बेपत्ता व्यक्तीचा मृतदेह सापडला
By लोकमत न्यूज नेटवर्क | Published: September 25, 2021 04:28 AM2021-09-25T04:28:32+5:302021-09-25T04:28:32+5:30
लोकमत न्यूज नेटवर्क सांगली : शहरातील नळभाग परिसरातील बेपत्ता व्यक्तीचा मृतदेह शुक्रवारी कृष्णा नदीत आयर्विन पुलाजवळ सापडला. मुन्वर शब्बीर ...
लोकमत न्यूज नेटवर्क
सांगली : शहरातील नळभाग परिसरातील बेपत्ता व्यक्तीचा मृतदेह शुक्रवारी कृष्णा नदीत आयर्विन पुलाजवळ सापडला. मुन्वर शब्बीर शरीकमसलत (वय ४६) असे त्यांचे नाव असून, ते पंचशीलनगर येथे रेल्वे गेटमन म्हणून कार्यरत होते.
पोलिसांनी दिलेली माहिती अशी की, बुधवारपासून मुन्वर बेपत्ता होते. त्यांच्या नातेवाइकांनी याबाबत शहर पोलिसात फिर्याद दिली होती. शुक्रवारी सकाळी काही नागरिकांना आयर्विन पुलाजवळ पाण्यात एक मृतदेह आढळला. त्यांनी तातडीने पोलिसांना याची माहिती दिली. पोलिसांनी तत्काळ घटनास्थळी भेट देत मृतदेह बाहेर काढून त्याची उत्तरीय तपासणी करण्यासाठी तो शासकीय रुग्णालयात हलवला. त्यानंतर मृतदेह नातेवाइकांच्या ताब्यात देण्यात आला. मुन्वर यांच्या मृत्यूचे नेमके कारण समजू शकले नाही. उत्तरीय तपासणीचा अहवाल आल्यानंतरच हे स्पष्ट होणार असल्याचे पाेलीस अधिकाऱ्यांनी सांगितले.