चिपळूण : शहरातील मार्कंडी येथील परकार चाळनजीक गंजलेला विद्युत खांब अचानक कोसळल्याची घटना सोमवारी सायंकाळी घडली. यावेळी विद्युत तारेचा झटका बसून एका गाढवाचा मृत्यू झाला आहे. या घटनेमुळे या भागातील वीजपुरवठा खंडित झाला होता.
सध्या शहरात नवीन वीज खांब उभारण्याचे काम सुरू आहे. मात्र, जुने गंजलेले वीज खांब बदलण्याची मागणी अनेकदा होऊनही बदलले जात नसल्याने नाराजी व्यक्त केली जात आहे. अशातच मार्कंडी येथील परकार चाळनजीक गंजलेला विद्युत खांब गाढवाच्या धक्क्याने खाली कोसळला. त्यानंतर विद्युत तारेचा त्या गाढवाला धक्का बसला आणि त्यातच त्याचा मृत्यू झाला. या घटनेनंतर परिसरातील वीजपुरवठा खंडित झाला होता. तत्काळ महावितरणच्या कर्मचाऱ्यांनी घटनास्थळी धाव घेतली. उशिरापर्यंत दुरुस्तीचे काम सुरू होते. भरवस्तीत ही घटना घडल्याने महावितरणच्या कारभाराविषयी तीव्र नाराजी व्यक्त केली जात आहे. सुदैवाने लहान मुले व अन्य व्यक्ती तेथे नसल्याने अनर्थ टळला.