रत्नागिरी : प्रधानमंत्री सूक्ष्म अन्न प्रक्रिया उद्योग योजनेंतर्गत जिल्ह्यातील फळप्रक्रिया उद्योगांना गती देण्यासाठी कृषी समूह गटांसाठी फळप्रक्रिया उद्योग उभारणीसाठी सहकार्य केले जाणार आहे.
केंद्राची प्रधानमंत्री सूक्ष्म अन्न प्रक्रिया उद्योग योजना २०२१-२२ ते २०२४-२५ अखेर पाच वर्षे राबविण्यात येणार आहे. जिल्ह्यातील फळप्रक्रिया उद्योगांना गती देण्यासाठी या योजनेची मदत होणार आहे. ही योजना असंघटित क्षेत्रातील अन्न प्रक्रिया उद्योगांसाठी राबवली जाणार आहे. वैयक्तिक लाभार्थी, बचतगट, शेतकरी कंपनी यांना याचा लाभ घेता येणार आहे.
अन्न प्रक्रिया उद्योग उभारणी, उद्योगस्तरवृध्दी, विस्तारीकरण, आधुनिकीकरण यासाठी या योजनेचा लाभ घेता येतो. नवीन उद्योग असल्यास आंबा प्रक्रियेसाठी तर जुना उद्योग असल्यास आंबा, काजू, फणस, कोकम, खाद्यपदार्थ, पिठे, मसाले उद्योग, मांस प्रक्रिया, दूध प्रक्रिया यासाठी योजनेचा लाभ घेता येणार आहे. वैयक्तिक लाभार्थ्यांसाठी पॅनकार्ड, आधारकार्ड, पासिंग प्रमाणपत्र, राहत्या घराचे वीजबिल, बँक पासबुक मागील सहा महिन्यांची छायाप्रत, उद्योग ज्या जागेत करणार त्याचा घरपत्रक उतारा, भाडे करारपत्र, मशिनरी कोटेशन्स, नवीन बांधकाम करणार असल्यास ७/१२, बांधकाम नकाशा व अंदाजपत्रक या कागदपत्रांद्वारे या योजनेत सहभागी होता येणार आहे.
बचत गटांसाठी बचतगट स्थापनेवेळचा ठराव, बँक पासबुक छायाप्रत, सर्व सदस्यांचे आधारकार्ड, असल्यास पॅनकार्ड, सर्व सदस्यांचे पासपोर्ट आकारातील फोटो, कोटेशन, जागेचा भाडेकरार, उद्योग ज्या जागेत करणार त्याचा घरपत्रक उतारा, मशिनरी कोटेशन्स, कर्ज काढण्यासाठीचा गटाचा ठराव ही कागदपत्रे दिल्यावर योजनेचा लाभ मिळणार आहे. वैयक्तिक लाभासाठी ऑनलाईन संकेतस्थळावर अर्ज करावेत. शेतकरी कंपनी, बचत गटांनी तालुका कृषी अधिकारी किंवा व्यवस्थापक, महिला आर्थिक विकास महामंडळ यांच्याकडे ऑफलाईन अर्ज सादर करण्याचे आवाहन केले आहे.
------------------------
‘एक जिल्हा, एक उत्पादन’ धोरणानुसार जिल्हास्तरावर वैयक्तिक उद्योजक आणि विविध गटांचे सदस्य, स्वयंसहाय्यता गट, शेतकरी उत्पादक संघ, कंपनी, संस्था आणि सहकारी उत्पादकांना या योजनेतून लाभ दिला जाणार आहे.
- शिवराज घोरपडे, जिल्हा कृषी अधीक्षक, रत्नागिरी