जिल्हा परिषद शाळेची चंद्रभरारी..! ११ विद्यार्थिनींची नावे नासाच्या चंद्र मोहिमेत

खालुंब्रेच्या लेकींची थेट चंद्रवारी..! जिल्हा परिषद शाळेतील ११ विद्यार्थिनी व ११ शिक्षकांची नावे नासाच्या आर्टेमिस–२ मोहिमेत झळकणार

चाकण : जिल्हा परिषद शाळा, खालुंब्रे (ता. खेड) येथील विद्यार्थिनींनी अवकाशभरारी घेत शिक्षणाच्या इतिहासात सुवर्णाक्षरांनी नोंद होईल असा क्षण अनुभवला आहे. या शाळेतील ११ विद्यार्थिनी आणि ११ शिक्षकांची नावे थेट चंद्रापर्यंत पोहोचणार असून, नासा या आंतरराष्ट्रीय अवकाश संशोधन संस्थेच्या आर्टेमिस–२ प्रकल्पांतर्गत ही नावे एसडी कार्डमध्ये संग्रहित करून ओरियन अंतराळयानाद्वारे चंद्राभोवतीच्या मोहिमेत पाठवली जाणार आहेत. या अनोख्या उपक्रमासाठी विद्यार्थिनींना नासाकडून थेट ‘बोर्डिंग पास’ देण्यात आले आहेत.

हा गौरवपूर्ण क्षण घडवून आणण्यात मायक्रोसॉफ्ट पुरस्कारप्राप्त शिक्षक नागनाथ विभुते यांचा मोलाचा पुढाकार ठरला आहे. नासा सध्या राबवत असलेला आर्टेमिस–२ प्रकल्प मानवी चंद्रमोहिमांच्या दिशेने अत्यंत महत्त्वाचा टप्पा मानला जातो. या मोहिमेत नासाचे अंतराळवीर रीड वाईझमन, व्हिक्टर ग्लोव्हर, क्रिस्टीना कोच तसेच कॅनेडियन स्पेस एजन्सीचे जेरेमी हॅन्सन हे एसएलएस (स्पेस लॉन्च सिस्टम) रॉकेट आणि ओरियन अंतराळयानातून अवकाशात झेप घेणार आहेत.

दरम्यान, नागनाथ विभुते यांच्या पुढाकारातून शाळेत खालुंब्रे ॲस्ट्रॉनॉमी क्लबची स्थापना करण्यात आली असून, या माध्यमातून नासाच्या सेवानिवृत्त व भारतीय वंशाच्या संशोधिका सुनीता विल्यम्स यांच्याशी विद्यार्थ्यांची वर्च्युअल भेट घडवून आणण्याचा मानस आहे.

या विद्यार्थिनींची नावे जाणार चंद्रावर :

अनुष्का गायकवाड, अर्णवी जिडगुले, वैष्णवी रवींद्र पवार, दीक्षा कांबळे, गायत्री कांबळे, काव्या पवार, पूजा रूपनर, प्रिया बोत्रे, पूर्वी आघाव, वैष्णवी जितेंद्र पवार.

 

या शिक्षकांची नावे चंद्रावर

जगदीश बैरागी, छाया महाजन, प्रभावती बैरागी, रत्नप्रभा वाळुंज, ललिता पवार, स्वाती कुदरी, हरिदास भांगरे, उमा पाटील, दीपाली विभुते, नागनाथ विभुते, विभावरी खोसे.

१० दिवसांची मोहीम

नासा कृत आर्टेमिस–२ ही अंदाजे १० दिवसांची मोहीम एप्रिल २०२६ पूर्वी फ्लोरिडामधील केनेडी स्पेस सेंटर येथून प्रक्षेपित होणार आहे. अंतराळवीर चंद्राच्या पलीकडे सुमारे ४,६०० मैलांचा प्रवास करून सॅन दिएगोच्या किनाऱ्याजवळील पॅसिफिक महासागरात सुरक्षित उतरणार आहेत. एकीकडे जिल्हा परिषद शाळांतील पटसंख्या घटत असताना, मुलींच्या शिक्षणाला अवकाशाची दिशा देणारा हा उपक्रम प्रेरणादायी ठरत आहे. या उल्लेखनीय कार्याचे शिक्षणाधिकारी संजय नाईकडे, गटशिक्षणाधिकारी अमोल जंगले आणि केंद्रप्रमुख सुषमा जाधव यांनी विशेष कौतुक केले आहे.