होय, एटीएममधील चोऱ्या रोखणे आहे शक्य! पुण्यात आला प्रत्यय

गेल्या काही महिन्यात पुणे, पिंपरी, तसेच पुणे जिल्हा, नाशिक येथे चोरटे अख्खे एटीएम मशीन उचकटून नेत असल्याचे आढळून आले आहे़..

ठळक मुद्देमांजरीमधील एटीएमची चोरी सेन्सर प्रणालीद्वारे व्हिजिलन्स ठेवल्याने रोखता आली ही चोरी

विवेक भुसेपुणे : पहाटे तीन वाजता हडपसर पोलीस ठाण्यातील फोन खणखणतो, आपण मुंबईतून बोलत असून मांजरी येथील एचडीएफसी बँकेच्या एटीएममधील सीसीटीव्हीला एक जण चिखल लावत आहे. चोरी होण्याची शक्यता आहे ही माहिती मिळाल्याबरोबर मांजरी भागात गस्तीवर असलेले मार्शल आकाश गायकवाड, सचिन कांबळे तातडीने शोध घेऊ लागतात. काही वेळातच घुले शाळेजवळील एका एटीएममध्ये एक चोरटा एटीएम मशीनचा दरवाजा तोडून मशीन उघडण्याचा प्रयत्न करत असल्याचे आढळून आले.पोलिसांनी त्याला रंगेहाथ पकडले. गेल्या काही महिन्यात पुणे, पिंपरी, तसेच पुणे जिल्हा, नाशिक येथे चोरटे अख्खे एटीएम मशीन उचकटून नेत असल्याचे आढळून आले आहे. यातील काही टोळ्यांना पकडण्यात पोलिसांना यश आले आहे.अनेक ठिकाणी एटीएम मशीनचे शटर अर्धवट बंद असल्याचे ग्राहकांकडून समजल्यावर तेथे चोरी झाल्याचे बँकांना समजल्याची अनेक प्रकरणे दिसून आली आहेत. अशावेळी मांजरीमधील एटीएमची चोरी सेन्सर प्रणालीद्वारे व्हिजिलन्स ठेवल्याने ही चोरी रोखता आली आहे. 

ही चोरी रोखण्यासाठी विशेष प्रयत्न केलेल्या मुंबईतील मॉडर्न इन्फोमॅटिकचे अधिकारी कृणाल गावडे यांनी सांगितले की, सेन्सर प्रणालीद्वारे व्हिजिलन्स ठेवल्यास एटीएममधील चोºया रोखणे सहज शक्य आहे. आमच्या कंपनीकडे एचडीएफसीबरोबर अनेक बँकांच्या सुरक्षेची जबाबदारी आहे. ज्या एटीएम सेंटरची सुरक्षेची जबाबदारी आहे.त्या ठिकाणी आम्ही सेन्सर प्रणाली व कॅमेऱ्यांचा वापर करतो. त्यावर २४ तास निगराणी ठेवली जाते. असे काम करणाऱ्या अनेक कंपन्या असून आमच्याकडे भारतभरातील बँकांच्या शाखा व एटीएम सेंटरच्या सुरक्षेची जबाबदारी आहे. तेथील एटीएम मशीन, सीसीटीव्ही कॅमेरा अथवा इतर वस्तूंना हात लावला तर आमच्याकडे अलर्ट जनरेट होतो. आमचे कर्मचारी तातडीने त्याकडे लक्ष देऊन सेंटरमध्ये आलेला ग्राहक काय करतो याची पाहणी करतात. प्रसंगी त्याला आमच्या ऑफिसमधून तेथील स्पिकरवर इशारा देतात़ तरीही त्याने ऐकले नाही तर जवळच्या पोलीस ठाण्याला तातडीने कळविले जाते.या घटनेतही त्या चोरट्याने एटीएमचे सायरन तोडले व सीसीटीव्ही कॅमेऱ्यावर चिखल लावला. त्याबरोबर आम्ही हडपसर पोलिसांना कळविले आणि त्या चोरट्याला पकडले.

़़़़़़़ज्या एटीएम सेंटरमध्ये ही प्रणाली वापरण्यात आली आहे. त्या ठिकाणी आम्ही दरवाजाला सेन्सर तसेच आत कॅमेरे, स्पिकर बसविलेले असतात. त्याद्वारे एटीएम सेंटरच्या दरवाजाला ग्राहकाने हात लावल्यापासून तो परत जाईपर्यंतच्या सर्व हालचाली आम्ही पाहू शकतो.पुण्यातील ३०० एटीएम सेंटरमध्ये आम्ही ही यंत्रणा बसविलेली आहे. त्याचबरोबर बँकांच्या शाखा बंद झाल्यापासून त्या पुन्हा उघडेपर्यंतच्या काळात तेथे इलेक्ट्रॉनिक्स व्हिजिलन्सद्वारे आम्ही सुरक्षा पुरवत असल्याचे गावडे यांनी सांगितले.