रस्त्यावरील खड्ड्यांमुळे यवतला कसरत

नांदूर-सहजपूर ( ता.दौंड ) रस्त्यावर मोठमोठे खड्डे पडले असून यामुळे वाहनचालकांना कसरत करावी लागत आहे.

यवत : नांदूर-सहजपूर ( ता.दौंड ) रस्त्यावर मोठमोठे खड्डे पडले असून यामुळे वाहनचालकांना कसरत करावी लागत आहे. सदर रस्त्यावरून क्षमातेपक्षा जास्त वाळू वाहतूक मोठ्या प्रमाणावर होत असल्याने रस्त्याची दुरवस्था झाल्याचे नागरिकांकडून सांगितले जाते.नांदूर व सहजपूर या परिसरात मोठ्या प्रमाणावर कंपन्या आहेत. यामुळे या रस्त्यावरून मोठी वाहतूक असते. यातच नांदूरपासून पुढे काही अंतरावर मुळा-मुठा नदीचे पात्र आहे. या भागातून प्रमाणापेक्षा जास्त वाळू भरुन वाहतूक होते. यावर कसलेही नियंत्रण नाही. यामुळे रस्ता ठिकठिकाणी खचला आहे. खचलेल्या रस्त्यावरून इतर वाहने जाणे अवघड बनत आहे. लहान प्रवासी वाहनांचे या रस्त्यावरून जाताना नुकसान देखील होते. या परिसरात खाजगी कंपन्या असल्याने कामगार वर्गाला नित्यनेमाने याच रस्त्यावरून कामाला जावे लागते. यामुळे तातडीने रस्त्याची दुरुस्ती करावी अशी मागणी होत आहे.मिरवडी, दहिटणे, या परिसरातील वाड्या-वस्त्या तसेच राहू बेटातील अनेक गावंकडे पुणे-सोलापूर महामार्गावरून जाण्यासाठी हा मार्ग जवळचा आहे. यासाठी विशेष लक्ष देऊन चांगल्या प्रतीचा रस्ता करावा अशी मागणी होत आहे. (वार्ताहर)