पोलिसांसारखा गणवेश परिधान करून व्हिडिओ कॉलचा वापर; कारवाईची भीती दाखवून ज्येष्ठाची २० लाखांची फसवणूक

ज्येष्ठ नागरिकाच्या बँक खात्याचा वापर दहशतवादी संघटनांना पैसे पुरवणे, तसेच मनी लाँड्रिंगसाठी झाल्याची बतावणी चोरट्यांनी केली.

पुणे : दहशतवादी हल्ला, तसेच मनी लाँड्रिंगसाठी बँक खात्याचा वापर झाल्याची भीती दाखवून ज्येष्ठ नागरिकांची फसवणूक करण्याचे सत्र कायम आहे. सायबर चोरट्यांनी पाषाण भागातील एका ज्येष्ठाची २० लाख ६५ हजार रुपयांची फसवणूक केल्याचा प्रकार उघडकीस आला आहे. या प्रकरणी सायबर चोरट्यांविरोधात गुन्हा दाखल करण्यात आला आहे.

याबाबत एका ज्येष्ठ नागरिकाने सायबर पोलिस ठाण्यात फिर्याद दिली आहे. पोलिसांनी दिलेल्या माहितीनुसार, तक्रारदार ज्येष्ठ नागरिक पाषाण भागात राहायला आहेत. सायबर चोरट्यांनी त्यांच्या मोबाइल नंबरवर संपर्क साधला. चोरट्याने ज्येष्ठाशी संपर्क साधताना व्हिडिओ काॅलचा वापर केला होता. चोरट्यांनी पोलिसांसारखा गणवेश परिधान केला होता. ज्येष्ठ नागरिकाच्या बँक खात्याचा वापर दहशतवादी संघटनांना पैसे पुरवणे, तसेच मनी लाँड्रिंगसाठी झाल्याची बतावणी चोरट्यांनी केली. या प्रकरणात अटक करण्यात येणार असल्याची भीती चोरट्यांनी त्यांना दाखवली. चोरट्यांनी त्यांना तातडीने बँक खात्यात पैसे जमा करण्यास सांगितले. त्यानंतर १८ ते २१ नोव्हेंबर या कालावधीत चोरट्यांच्या बँक खात्यात ज्येष्ठ नागरिकाने वेळोवेळी २० लाख ६५ हजार रुपये जमा केले. फसवणूक झाल्याचे लक्षात आल्यानंतर त्यांनी पोलिसांकडे तक्रार अर्ज दिला. पुढील तपास पोलिस निरीक्षक ननावरे करत आहेत.

शेअर बाजारात गुंतवणुकीच्या आमिषाने २७ लाखांची फसवणूक...

शेअर बाजारात गुंतवणुकीच्या आमिषाने सायबर चोरट्यांनी एकाची २७ लाख ४१ हजार रुपयांची फसवणूक केल्याचा प्रकार उघडकीस आला. याबाबत एकाने खडकी पोलिस ठाण्यात फिर्याद दिली आहे. तक्रारदार खडकीतील रेंजहिल्स परिसरात राहायला आहे. सायबर चोरट्यांनी त्यांच्या मोबाइल नंबरवर संपर्क साधून शेअर बाजारात गुंतवणुकीचे आमिष दाखवले होते. शेअर बाजारात गुंतवणूक केल्यास चांगला परतावा मिळेल, असे आमिष दाखवून चोरट्यांनी त्याला जाळ्यात ओढले. चोरट्यांच्या खात्यात त्यांनी वेळोवेळी पैसे जमा केले. त्याला परतावा देण्यात आला नाही. फसवणूक झाल्याचे लक्षात आल्यानंतर त्याने नुकतीच पोलिसांकडे तक्रार दिली. वरिष्ठ पोलिस निरीक्षक विक्रमसिंग कदम पुढील तपास करत आहेत.

तरुणीची १२ लाखांची फसवणूक...

वर्क फ्रॉम होमचे आमिष दाखवून सायबर चोरट्यांनी तरुणीची १२ लाख १५ हजार रुपयांची फसवणूक केल्याचा प्रकार उघडकीस आला आहे. याप्रकरणी सायबर चोरट्यांविरोधात विश्रांतवाडी पोलिसांनी गुन्हा दाखल केला आहे. याबाबत एका तरुणीने फिर्याद दिली आहे. सायबर चोरट्यांनी तरुणीच्या मोबाइल नंबरवर मेसेज पाठवला होता. वर्क फ्रॉम होम पद्धतीने काम केल्यास चांगला परतावा मिळेल, असे आमिष चोरट्यांनी तरुणीला दाखवले. तरुणीला सुरुवातीला परताव्यापोटी काही रक्कम दिली. त्यानंतर तरुणीला चोरट्यांनी ऑनलाइन कामात पैसे गुंतविण्यास सांगितले. पैसे गुंतविल्यानंतर तरुणीला परतावा देण्यात आला नाही. पुढील तपास वरिष्ठ पोलिस निरीक्षक मंगेश हांडे करत आहेत.