बारामती : बारामती नगर परिषदेच्या इमारतीवर ‘बारामती नगर परिषद’ या अक्षरांचा रंग उडाल्याचे पाहून संतापलेल्या उपमुख्यमंत्री अजित पवार यांनी पदाधिकाऱ्यांना तातडीने ही अक्षरे बदलण्याची सूचना केली. दोन तासात रंग उडालेली अक्षरे बदला. मी पुन्हा दोन तासाने पुन्हा येऊन झालेला बदल पाहणार असल्याचे सांगायला पवार विसरले नाहीत. त्यानंतर संपूर्ण यंत्रणा कामाला लागली. अवघ्या दोन तासात ‘बारामती नगर परिषदे’ची नवीन अक्षरे लावण्यात आली. जुनी रंग उडालेली अक्षरे बदलून नवीन रंगीत ‘नाव’ लावेपर्यंत नगर परिषद अधिकारी, कर्मचारी त्या ठिकाणी थांबून होते.
शनिवारी (दि २५) सकाळी बारामती नगर परिषदेच्या सोलर प्रकल्पाचे भल्या सकाळी उद्घाटन झाले. यावेळी नगराध्यक्षा पौर्णिमा तावर, प्रांताधिकारी दादासाहेब कांबळे यांच्यासह सर्व नगरसेवक उपस्थित होते. यावेळी शहरात लावण्यात येणाऱ्या फ्लेक्सबाबत कडक धोरणाचा अवलंब करण्याची सूचना उपमुख्यमंत्री पवार यांनी केली. यावेळी पवार यांनी नगर परिषद पदाधिकाऱ्यांसह कर्मचाऱ्यांची झाडाझडती घेत कडक सूचना दिल्या. शहराच्या सुशोभिकरणात बाधा आणणाऱ्या बाबी निदर्शनास आल्याने उपमुख्यमंत्र्यांचा पारा चढला. त्यामुळे उपस्थितांची तारांबळ उडाली.
उपमुख्यमंत्री अजित पवार यांनी काही फ्लेक्स पाहिल्याने याबाबत कडक धोरण अवलंबण्याची सुचना केली. याबाबत कोणालाही दयामाया दाखवू नका,अगदी अजित पवार असेल तरी गुन्हा दाखल करा. नगरसेवकाने लावल्यास नगरसेवक पद घालवा. शासकीय कामात अडथळा आणणाऱ्यांवर गुन्हे दाखल करा, अजित पवार तुमच्या पाठीशी आहे, अशा शब्दात उपमुख्यमंत्री पवार यांनी प्रशासनाला सूचना दिल्या.
पाऊण तास आधीच सकाली ६.३० लाच पोहचले
उपमुख्यमंत्री पवार यांनी पहाटे ५.३० वाजल्यापासून एसटी बसस्थानक, कऱ्हा नदी, निरा डावा सुशोभिकरणाच्या पाहणी केली. त्यानंतर निरा डावा कालव्याची पाहणी करीत पवार पायीच नगरपालिकेत पोहचले. नियोजित कार्यक्रम ७.१५ वाजता होता. मात्र, पवार त्यापूर्वी सुमारे पाऊण तास अगोदर ६.३० लाच पोहचले.
फोटो ओेळी : उपमुख्यमंत्री अजित पवार यांच्या सूचनेनंतर रंग उडालेली ‘बारामती नगर परिषद’नावाची अक्षरे तातडीने बदलण्यात आली.
२५०९२०२१ बारामती—०२