Uday Samant: शिंदेसेनेत चांगले काम न करणाऱ्यांना पदावरून दूर करण्यात येईल; उदय सामंत यांचा इशारा

Uday Samant पुढील ३० दिवस मतदारसंघांतील संघटनेच्या कामाची माहिती घेतली जाईल. चांगले काम न करणाऱ्यांना पदावरून दूर करण्यात येईल

पिंपरी : संघटनेतील जे पदाधिकारी पदे घेऊन काम करीत नाहीत, त्यांना पदावर ठेवायचे की नाही याबाबत निर्णय घेण्यात येईल. कार्यकारिणी बरखास्त करून आताचे पदाधिकारी आजपासून प्रभारी म्हणून काम करतील. पुढील ३० दिवस मतदारसंघांतील संघटनेच्या कामाची माहिती घेतली जाईल. चांगले काम न करणाऱ्यांना पदावरून दूर करण्यात येईल, असा इशारा शिंदेसेनेचे पुणे जिल्हा संपर्कप्रमुख, उद्योगमंत्री उदय सामंत यांनी थेरगाव येथे शुक्रवारी (दि. ४) दिला.

पुणे, मावळचे संपर्कप्रमुख झाल्यानंतर सामंत यांनी थेरगाव येथे पदाधिकाऱ्यांची बैठक घेतली. पिंपरी, चिंचवड, भोसरी, मावळ विधानसभा मतदारसंघांतील संघटनेच्या कामाचा आढावा घेतला. उपनेते खासदार श्रीरंग बारणे व इरफान सय्यद, उपनेत्या सुलभा उबाळे, शहरप्रमुख नगरसेवक नीलेश तरस, जिल्हाप्रमुख राजेश खांडभोर आणि पदाधिकारी यावेळी उपस्थित होते.

सामंत म्हणाले की, पक्ष संघटनेच्या कामाबाबत कोणतीही तडजोड खपवून घेतली जाणार नाही. मतदार याद्या तपासणीचे काम सुरू आहे. त्यावर बारकाईने लक्ष ठेवा. संघटना महत्त्वाची आहे. संघटनेपेक्षा कोणी मोठे नाही.

खासदार बारणे म्हणाले की, महापालिका निवडणुकीत कार्यकर्त्यांना बळ देण्याचे काम संघटनेने केले. शिवसैनिकांनी केवळ पदाची अपेक्षा न ठेवता झोकून देऊन संघटना वाढीसाठी काम करावे. मला कोणते पद मिळाले नाही तर मी जातो, अशी कोणी भूमिका घेऊ नये. इतर पक्षांपेक्षा शिवसेनेची कामाची पद्धत वेगळी आहे.