Baramati Bypoll Election: सुनेत्रा पवारांच्या विनंतीला मान दिला; अखेर बारामती पोटनिवडणुकीतून काँग्रेसची माघार

अजितदादांच्या जागेवर सुनेत्रा पवार यांची निवड व्हावी अशी बारामतीकरांची इच्छा होती

पुणे :  बारामती विधानसभा पोटनिवडणुकीसाठी उपमुख्यमंत्री सुनेत्रा पवार यांनी सोमवारी जोरदार शक्तिप्रदर्शन करत उमेदवारी अर्ज दाखल केला. यावेळी महायुतीतील दिग्गज नेत्यांची उपस्थिती पाहायला मिळाली. महायुतीतील प्रमुख नेत्यांनी उपस्थित राहून पवार यांच्या उमेदवारीला बळ अन् पाठिंबा दिला. तसेच लक्ष्मण हाके यांनी माघार घेत सुनेत्रा पवार यांना पाठिंबा दिला. परंतु करुणा मुंडे, काँग्रेसचे उमेदवार आकाश मोरे हे सुद्धा रिंगणात उतरले होते. अखेर सुनेत्रा पवार यांच्या विनंतीला मान देत काँग्रेसने आज बारामती पोटनिवडणुकीतून माघार घेतल्याची माहिती प्रदेशाध्यक्ष हर्षवर्धन सपकाळ यांनी दिली आहे. 
 
अजित पवार यांच्या निधनानंतर बारामती विधानसभेची जागा रिक्त जागा झाली होती. त्यानंतर याठिकाणी पोटनिवडणूक जाहीर झाली. अजितदादांवरील बारामतीकरांचे प्रेम पाहता ही निवडणूक बिनविरोध व्हावी अशी त्यांची इच्छा होती. त्यामुळे भाजप आणि शरद पवार पक्षाने याठिकाणी उमेदवार न देण्याचे जाहीर केले. परंतु काँग्रेसने बारामती पोटनिवडणुकीसाठी आकाश मोरे उमेदवार दिला होता. ही निवडणूक बिनविरोध होणार नसल्याचे स्पष्ट झाले. मात्र सुनेत्रा पवार यांनी हर्षवर्धन सपकाळ यांना फोन करून माघार घेण्याची विनंती केल्याची माहिती सपकाळ यांनी दिली. अखेर आज माघार घेण्याच्या शेवटच्या दिवशी काँग्रेसने पोटनिवडणुकीतून माघार घेतली आहे. आता बारामती विधानसभेत अजित पवारांच्या जागेवर सुनेत्रा पवार यांचा नावाचा शिक्कामोर्तब झाला आहे.