लोकमत न्यूज नेटवर्क
पुणे : शहरात सध्या दररोज ४ ते ५ वाहने चोरीला जात असून त्यातील निम्म्यांहून अधिक वाहने ही कधीच सापडत नाही. अनेकदा चोरटे वाहन चोरी करुन त्याचा वापर करुन चोरी करताना आढळून आले आहे. शहरात जानेवारी ते डिसेंबर अखेर ९६७ वाहने चोरीला गेली असून त्यापैकी केवळ ३८ टक्के वाहनांचा शोध लावण्यात यश आले आहे.
चोरीच्या कामासाठी वापर
पुणे, मुंबईसारख्या शहरातून यापूर्वी आलिशान कार चोरीला जाण्याचे प्रमाण वाढले होते. या कारचा वापर राजस्थान सीमेवर अंमली पदार्थांच्या तस्करीसाठी केला जात असल्याचे आढळून आले आहे. बकर्या चोरीसाठी चोरट्यांनी ५० हून अधिक वाहने चोरल्याचे उघड झाले आहे. ट्रक व इतर जड वाहने चोरुन ती भंगारच्या दुकानात नेऊन त्यांची मोडतोड करुन त्याचे पार्ट विकणारी टोळी पोलिसांनी पकडली होती. त्यांनी अनेक वाहने तोडून त्यांचे स्पेअरपार्ट वेगळे करुन त्याची विक्री केली होती. पुण्यात चोरलेली वाहने सोलापूर, बार्शी तसेच मराठवाड्यातील शहरांमध्ये विकली जातात. त्यासाठी बनावट कागदपत्रे तयार केली जातात. अनेकदा गाडी विकताना सुरुवातीला हे चोरटे पैसे घेतात, कागदपत्रे नंतर आणून देतो, मग उरलेले पैसे द्या, असे सांगतात. पण नंतर त्यांना कागदपत्रे दिलीच जात नाही.
मौजेसाठी, प्रेयसीवर इम्प्रेशन मारण्यासाठी
अनेक तरुण मौजमजेसाठी वाहने चोरत असल्याचे आढळून आले आहे. त्यातील पेट्रोल संपल्यावर ते कोठेही वाहने सोडून देत असल्याचे आढळून आले आहे. एका प्रेमवीराने तर प्रेयसीवर इम्प्रेशन पाडण्यासाठी महागड्या दुचाकी वाहने चोरल्याचे तपासात निष्पन्न झाले आहे.
--
शहरातील महत्वाच्या गुन्ह्यांपैकी वाहनचोरीचे गुन्हे उघडकीस आणण्यात अनेक अडथळे असतात. त्यात प्रामुख्याने दुचाकीची वाहनांची वाढती संख्या असल्याने चोरीचे वाहन कोणते हे ओळखणे अवघड जाते. त्यामुळे गेल्या वर्षी साधारण दुचाकी वाहनांचे गुन्हे उघडकीस येण्याचे प्रमाण ३० टक्के, तीन चाकी वाहन चोरीचे उघडकीस येण्याचे प्रमाण ५८ टक्के व चारचाकी वाहन चोरीचे गुन्हे उघडकीस येण्याचे प्रमाण साधारण ३६ टक्के इतके राहिले आहे. अनेकदा एखादा चोरटा पकडण्यानंतर त्याच्याकडून अनेक वाहन चोरीचे गुन्हे उघडकीस येत असतात.
वाहन चोरी
२०२० ९६७
२०१९ १६७८
कोट
वाहनचोरी ही प्रामुख्याने दुसरा चोरीचा गुन्हा करण्यासाठी केली जात असते. अनेकदा शहरात चोरलेली वाहने खेडगावात विकण्याचे प्रकार घडतात. महिलांच्या गळ्यातील दागिने हिसकावून नेणार्या चोरट्यांपैकी बहुतांश चोरटे ही असे गुन्हे करताना चोरीच्या वाहनांचा वापर करत असल्याचे दिसून आले आहे.
- सुनील पंधरकर, वरिष्ठ पोलीस निरीक्षक, दरोडा व वाहनचोरी विरोधी पथक