शाळेतील भांडणाचा राग; दहावीत शिकणाऱ्या मुलावर तीक्ष्ण शस्त्राने वार, कोथरूड भागातील धक्कादायक घटना

शाळेत झालेल्या भांडणाचा राग मनात धरून दोघांनी एकाला शिवीगाळ करून मारहाण करण्यास सुरुवात केली, तसेच त्याच्यावर तीक्ष्ण शस्त्राने वार केले

पुणे : कोथरुड भागात दहावीतील एका मुलावर तीक्ष्ण शस्त्राने वार करण्यात आल्याची घटना घडली. शाळेत झालेल्या भांडणाचा राग मनात धरून हा प्रकार घडला. या प्रकरणी दाेघांविरुद्ध गुन्हा दाखल करण्यात आला आहे.

याबाबत बलराम हनुमंत लोखंडे (वय २४, रा. पांडुरंग काॅलनी, सुतारदरा, कोथरूड) याने कोथरूड पोलिस ठाण्यात फिर्याद दिली आहे. त्याने दिलेल्या फिर्यादीनुसार, दोघांविरुद्ध गुन्हा दाखल करण्यात आला आहे. पोलिसांनी दिलेल्या माहितीनुसार, लोखंडे याचा लहान भाऊ हा दहावीमध्ये आहे. तो दि. १७ जानेवारी रोजी सायंकाळी साडेपाचच्या सुमारास कोथरूड परिसरातून निघाला होता. स्वामी समर्थ मठाजवळ दोघांनी त्याला अडवले. शाळेत झालेल्या भांडणातून दोघांनी त्याला शिवीगाळ करून मारहाण करण्यास सुरुवात केली. आरोपींनी त्याच्यावर तीक्ष्ण शस्त्राने वार केले. वरिष्ठ पोलिस निरीक्षक संदीप देशमाने यांनी घटनास्थळी भेट दिली. पसार झालेल्या आरोपींचा शोध घेण्यात येत आहे. पोलिस उपनिरीक्षक काळे तपास करत आहेत.