वारंवार विनाकारण पाठलाग; महिला अधिकाऱ्याचा गंभीर आरोप, भाजपच्या ओंकार कदमवर गुन्हा दाखल

ओंकार कदम आणि अक्षय कांबळे महापालिका विभागातील अन्य अधिकारी आणि कर्मचाऱ्यांच्या समोर अश्लील व अपमानास्पद टिप्पणी करत होते

पुणे: पुणे महानगरपालिकेतील एका महिला वैद्यकीय अधिकाऱ्याने केलेल्या गंभीर आरोपानंतर भाजपच्या पुणे कामगार आघाडीचे अध्यक्ष ओंकार कदम आणि अक्षय कांबळे यांच्यावर शिवाजीनगर पोलीस ठाण्यात गुन्हा दाखल करण्यात आला आहे. पुणे महानगरपालिकेत घडलेल्या या घटनेने एकच खळबळ उडाली होती.

पुणे महापालिकेत कार्यरत असलेल्या ३७ वर्षीय वैद्यकीय महिला अधिकाऱ्याने पोलिसांकडे दिलेल्या फिर्यादीत सांगितले की, आरोपी ओंकार कदम आणि अक्षय कांबळे हे वारंवार तिचा विनाकारण पाठलाग करत होते. इतकेच नव्हे तर तिच्या विभागातील अन्य अधिकारी आणि कर्मचाऱ्यांच्या समोर अश्लील व अपमानास्पद टिप्पणी करत होते. या वागणुकीमुळे फिर्यादी महिलेची समाजात बदनामी झाली असून, तिच्या चारित्र्यावर संशय घेणारी परिस्थिती निर्माण झाली आहे. यामुळे तिच्या मनावर मोठा मानसिक ताण आला असून, तिला आता कार्यालयात जाण्याचीही भीती वाटत असल्याचे तिने स्पष्ट केले आहे.

फिर्यादी महिला अधिकाऱ्याने अखेर धाडस करून शिवाजीनगर पोलीस ठाण्यात जाऊन तक्रार त्यानुसार, भारतीय दंड विधानाच्या संबंधित कलमांखाली ओंकार कदम आणि अक्षय कांबळे यांच्याविरोधात गुन्हा दाखल करण्यात आला आहे. या प्रकरणामुळे राजकीय वर्तुळातही खळबळ उडाली असून, भाजपमधील स्थानिक पातळीवरील नेतृत्वाचीही या प्रकरणाकडे गांभीर्याने दखल घेण्याची शक्यता आहे.शिवाजीनगर पोलिसांनी याप्रकरणी अधिक तपास सुरू केला असून, संबंधित आरोपींना लवकरच चौकशीसाठी बोलावले जाणार असल्याची माहिती पोलिसांकडून देण्यात आली आहे.