Pune Rave Party : पुण्यातील रेव्ह पार्टीबाबत कसे कळाले ? पोलिसांनी पत्रकार परिषदेत दिले उत्तर...

खराडीतील रेव्ह पार्टीपूर्वी आरोपींनी दोन वेगवेगळ्या ठिकाणी पार्ट्या केल्या होत्या. पहिली पार्टी कल्याणीनगरमधील एका पबमध्ये झाली. तिथे रात्री १.३० पर्यंत पार्टी सुरू होती.

 पुणे -  शहरातील उच्चभ्रू वर्तुळात मोठ्या थाटात सुरु असलेल्या रेव्ह पार्टीवर पुणे पोलिसांनी धडक कारवाई केली आहे. खराडी येथील एका आलिशान फ्लॅटवर सुरू असलेल्या रेव्ह पार्टीवर पोलिसांनी छापा टाकत माजी मंत्री एकनाथ खडसे यांचे जावई प्रांजल खेवलकर आणि प्रसिद्ध बुकी निखील पोपटासह सात जणांना ताब्यात घेतले आहे. मात्र या घटनेबाबत पुणे पोलिसांना कसे कळाले असा प्रश्नही चर्चेत आला आहे. यावर आज पुणे पोलिसांनी पत्रकार परिषद घेत माध्यमांशी बोलतांना माहिती दिली आहे. निखिल पिंगळे  (पोलिस उपायुक्त, गुन्हे शाखा)   यांनी या पत्रकार परिषदेत या कारवाई बाबत संपूर्ण माहिती दिली. 

पुणे पोलिसांनी सांगितले , आज पुण्यातील अमली पदार्थ प्रतिबंधक मोहिमे अतर्गत जी गुपनीय माहिती प्राप्त झाली त्या आधारावर शहरातील उच्चभ्रू सोसायटीमध्ये ही कारवाई करण्यात आली. या कारवाईत आरोपींना ताब्यात घेण्यात आले आहे. या प्रकरणात पोलिसांनी प्रांजल खेवलकरसह इतर आरोपींना ताब्यात घेऊन वैद्यकीय तपासणीसाठी ससून रुग्णालयात नेले. अमली पदार्थ प्रतिबंधक कायद्यानुसार गुन्हा दाखल करण्यात आला आहे. ही कारवाई मध्यरात्री साडे तीनच्या सुमारास करण्यात आली. या पार्टीबाबत सर्वात आधी क्राइम ब्रांचला माहिती मिळाली त्यानुसार ही कारवाई करण्यात आली. या पार्टी  २ .७  ग्रॅम कोकेन, १ ०  मोबाईल, दारू,  बियर बॉटल, हुक्का , हुक्का पॉट  सापडले आहे.

 

पोलिसांनी पुढे सांगितले, खराडी भागातील आलिशान फ्लॅटमध्ये हाऊस पार्टीच्या नावाखाली ड्रग पार्टी सुरू असल्याची माहिती गुन्हे शाखेतील अमली पदार्थविरोधी पथकाला मिळाली. मध्यरात्रीनंतर पोलिसांनी याठिकाणी छापा टाकला. तेथे ५ पुरुष आणि २ महिला रेव्ह पार्टी करताना आढळले. त्यात दारू, हुक्का यासह अमली पदार्थाचे सेवन केले जात असल्याचे दिसून आले. यावेळी कोकेन आणि गांजा सदृश्य अमली पदार्थ पोलिसांनी जप्त केले. ही पार्टी प्रांजल खेवलकर यांनी आयोजित केली असल्याचे सांगण्यात येते. प्रांजल खेवलकर हे एकनाथ खडसे यांची कन्या आणि राष्ट्रवादी काँग्रेस शरदचंद्र पवार पक्षाच्या महिला प्रदेशाध्यक्ष रोहिणी खडसे यांचे पती आहेत. दरम्यान, अटक केलेल्यांची पोलिसांनी ससून रुग्णालयात वैद्यकीय तपासणी केली असून, त्यांचे ब्लड सॅम्पलदेखील घेण्यात आल्याची माहिती सूत्रांनी दिली