रेल्वे स्टेशनवर खाद्यपदार्थ विक्रीतून प्रवाशांची लूट;अधिकृत विक्रेत्यांकडूनच लूट सुरू असल्याने दाद कोणाकडे मागायची?

- या दराप्रमाणेच रेल्वेगाडीत खाद्यपदार्थांची विक्री करणे बंधनकारक आहे; परंतु येथेही प्रवाशांकडून जादा दर आकारले जाते. याबाबत आयआरसीटीसी अधिकाऱ्यांना विचारले असता बोलण्यास नकार दिला.

- अंबादास गवंडी

पुणे :रेल्वेस्थानकावर अमूल, नेस कॅफे, हल्दीराम, लेहर यांसह इतर महत्त्वाच्या कंपन्यांकडून विविध खाद्यपदार्थांची विक्री करण्यात येते; परंतु या कंपन्यांकडून विकल्या जाणाऱ्या खाद्यपदार्थांचे दर किरकोळ बाजारातील दरापेक्षा दुप्पट आहेत. शिवाय खाद्यपदार्थांतील वजनात देखील फरक आहे; परंतु प्रवाशांना याची माहिती नसल्याने गरजेच्या वेळी खरेदी करावे लागते. नामांकित कंपन्यांकडूनच प्रवाशांची खुलेआम लूट होत असल्याने दाद कोणाकडे मागायची? असा प्रश्न उपस्थित केला जात आहे.

रेल्वेचा प्रवास स्वस्त असल्याने लाखो प्रवासी प्रवासासाठी रेल्वेला प्राधान्य देतात. प्रवाशांना इंडियन केटरिंग अँड टुरिझम कॉर्पोरेशनकडून (आयआरसीटीसी) आणि भारतीय रेल्वेकडून निविदा प्रक्रिया राबवून या कंपन्यांना रेल्वेस्थानकांवर पदार्थ विकण्यास परवानगी देण्यात येते; परंतु किरकोळ बाजार आणि रेल्वेस्थानकावर विकल्या जाणाऱ्या पदार्थांच्या दरात मोठी तफावत आहे. प्रवाशांना गरजेच्या वेळी नाइलाजाने पदार्थ खरेदी करावे लागते. याचा आर्थिक भुर्दंड प्रवाशांवर बसतो. अधिकृत विक्रेतेच लूट करत असल्याने प्रवाशांनी कोणाकडे दाद मागावी, असा प्रश्न उपस्थित केला जात आहे.

तसेच लांबपल्ल्याच्या एक्स्प्रेस रेल्वे गाड्यांमध्ये चहा, कॉफी, नाष्ट्याचे दर आयआरसीटीसीने ठरवून दिलेले आहेत. या दराप्रमाणेच रेल्वेगाडीत खाद्यपदार्थांची विक्री करणे बंधनकारक आहे; परंतु येथेही प्रवाशांकडून जादा दर आकारले जाते. याबाबत आयआरसीटीसी अधिकाऱ्यांना विचारले असता बोलण्यास नकार दिला.

असे आहेत दर...

हल्दीरामच्या शेव पॅकेट किरकोळ बाजारात १० रुपयाला ३७ ग्रॅम मिळते, तर रेल्वेस्थानकावर २० रुपयाला ५२ ग्रॅम मिळते. नियमानुसार हे पदार्थ ७४ ग्रॅम मिळाले पाहिजे. लेहरची कुरकुरे किरकोळ बाजारात १० रुपयाला ३९ ग्रॅम, तर रेल्वेस्थानकावर २० रुपयाला ५२ ग्रॅम मिळते. हल्दीरामचे फरसाण किरकोळ बाजारात १० रुपयाला ३९ ग्रॅम, रेल्वे स्थानकावर २० रुपयाला ५३ ग्रॅम मिळते. अमूल कोल कॅफे किरकोळ बाजारात ३५, तर रेल्वे स्थानकावर ६० रुपये इतके जादा दराने विकले जाते.

भारतीय रेल्वे ही जनतेची मालमत्ता आहे. ती कोणत्याही कंपनीच्या नफेखोरीसाठी किंवा प्रशासनाच्या साठगाठीसाठी वापरली जाऊ देणार नाही. देशातील सर्व रेल्वेस्थानकांवर आंतरराष्ट्रीय स्तरावरच्या उत्पादनांबाबत सुरू असलेली लूट आता सर्वांच्या लक्षात आली आहे. सर्वसामान्य प्रवाशांच्या खिशावर हा सरळसरळ डाका आहे. या गंभीर प्रकरणावर आम्ही हल्दीराम कंपनीला दोन वेळा ईमेल करून उत्तर मागितले; परंतु एकदाही प्रतिसाद दिला गेला नाही.  युवक काँग्रेस हा मुद्दा जनतेच्या न्यायासाठी शेवटपर्यंत लढवणार आहे. - अक्षय जैन, सरचिटणीस, महाराष्ट्र प्रदेश युवक काँग्रेस