Mundhwa land deal case : मुंढवा गैरव्यवहार प्रकरणातील मुद्रांक बुडविल्याप्रकरणी आता ३ मार्चला सुनावणी 

अमेडिया कंपनीला आता थकीत मुद्रांक शुल्क २१ कोटी आणि २ कोटी १० लाखांचा दंड असे २३ कोटी १० लाख रुपये भरावे लागणार आहेत.

पुणे :मुंढवा येथील सरकारी जमीन गैरव्यवहारप्रकरणी केलेल्या दस्तनोंदणीत मुद्रांक शुल्क बुडविल्यानंतर मुद्रांक शुल्क विभागाने पार्थ पवार यांच्या अमेडिया कंपनीला २१ कोटी आणि दंडाची रक्कम वसुलीसाठी दिलेली दोन महिन्यांची मुदत संपली. त्यानंतर कागदपत्रांच्या पूर्ततेसाठी आता विभागाने १५ दिवसांची मुदत वाढवून दिली असून, पुढील सुनावणी ३ मार्च रोजी होणार आहे. दरम्यान, अमेडिया कंपनीला आता थकीत मुद्रांक शुल्क २१ कोटी आणि २ कोटी १० लाखांचा दंड असे २३ कोटी १० लाख रुपये भरावे लागणार आहेत. त्यानंतरही रक्कम न भरल्यास सक्तीने वसुली करण्यात येणार असल्याची माहिती सूत्रांनी दिली. 

मुंढवा येथील बोटॅनिकल सर्वे ऑफ इंडियाच्या जमीन गैरव्यवहारात मुद्रांक शुल्क बुडविल्यानंतर सहजिल्हा निबंध कार्यालयाकडून सात टक्के मुद्रांक शुल्क अर्थात २१ कोटी रुपये तसेच २० मे या दस्त नोंदणीच्या तारखेपासून आजवर असा १ टक्केप्रमाणे १ कोटी ४७ लाख दंड असे एकूण २२ कोटी ४७ लाख रुपयांची रक्कम भरण्याचे आदेश दिले होते. ही रक्कम पुढील दोन महिन्यांची मुदत दिली होती. ही मुदत १२ फेब्रुवारीला संपली.

त्यानंतर कंपनीकडून नोंदणी महानिरीक्षक रवींद्र बिनवडे यांच्याकडे या प्रकरणी सुनावणी ठेवण्यात आली होती. ही सुनावणी सोमवारी (दि. १६) झाली. त्यात कंपनीच्या वकिलांनी बाजू मांडली. त्यात या प्रकरणी कागदपत्रांच्या पूर्तेतसाठी आणखी एक महिन्याची मुदतवाढ मिळावी, अशी विनंती करण्यात आली होती. मात्र, बिनवडे यांनी केवळ १५ दिवसांची मुदतवाढ दिली. त्यानुसार आता ३ मार्च रोजी या प्रकरणी सुनावणी होणार आहे. त्यात पुढील निर्णय घेण्यात येणार असल्याचे सूत्रांनी सांगितले.