शिष्यवृत्ती परीक्षेसाठी अर्ज भरण्याकरिता २८ फेब्रुवारीपर्यंत मुदतवाढ 

- शाळांच्या मागणीनुसार ही दुसरी व अंतिम मुदतवाढ जाहीर करण्यात आली आहे.

पुणे :महाराष्ट्र राज्य परीक्षा परिषदेतर्फे चौथी व सातवी शिष्यवृत्ती २०२६ परीक्षेची ऑनलाइन आवेदनपत्र भरण्यासाठी मुदतवाढ देण्यात आली आहे. शाळा नोंदणी व नियमित शुल्कासह विद्यार्थी अर्ज भरण्याची अंतिम मुदत २८ फेब्रुवारी २०२६ पर्यंत वाढवण्यात आली आहे.

परिषदेच्या वतीने घेण्यात येणारी प्राथमिक शिष्यवृत्ती परीक्षा (इ. ४ थी) आणि उच्च प्राथमिक शिष्यवृत्ती परीक्षा (इ. ७ वी) या दोन्ही परीक्षा दि. २६ एप्रिल २०२६ रोजी राज्यातील सर्व जिल्ह्यांत एकाच दिवशी पार पडणार आहेत. या परीक्षेबाबतची अधिसूचना दि. ३० डिसेंबर २०२५ रोजी प्रसिद्ध करण्यात आली होती. संबंधित माहिती व मार्गदर्शक सूचना परिषदेच्या अधिकृत संकेतस्थळावर उपलब्ध करून देण्यात आल्या आहेत.

पूर्वी जाहीर केलेल्या वेळापत्रकानुसार शाळा नोंदणी व विद्यार्थी ऑनलाइन आवेदनपत्र भरण्याची मुदत ३० डिसेंबर २०२५ ते १३ फेब्रुवारी २०२६ अशी होती. मात्र काही शाळांकडून तांत्रिक अडचणी व इतर कारणांमुळे अर्ज भरण्यास विलंब होत असल्याची माहिती परिषदेला प्राप्त झाली होती.

शाळांच्या मागणीनुसार ही दुसरी व अंतिम मुदतवाढ जाहीर करण्यात आली आहे. शाळांनी दिलेल्या नव्या मुदतीत आवश्यक कागदपत्रांसह विद्यार्थ्यांची नोंदणी पूर्ण करावी, असे आवाहन परिषदेचे अध्यक्ष डॉ. नंदकुमार बेडसे यांनी प्रसिद्ध पत्राद्वारे केले आहे.