मुंबईला जाण्यापूर्वी शरद पवार-प्रतिभा पवार यांची विद्या प्रतिष्ठानला अचानक भेट

- मुंबईकडे प्रवास करण्यापूर्वी शरद पवार या ठिकाणी आले होते. स्मारकाबाबत चर्चेनंतर थोड्याच वेळात ते मार्गस्थ झाले.

बारामती : ज्येष्ठ नेते शरद पवार रविवारी (दि. १) सकाळी पत्नी प्रतिभा पवार यांच्यासह मुंबईला जाण्यापूर्वी विद्या प्रतिष्ठानच्या मैदानावर उपमुख्यमंत्री अजित पवार यांचे अंत्यसंस्कार झालेले ठिकाण पाहायला पोहोचले. अजित पवार यांच्या निधनाला पाच दिवस झाले आहेत. या ठिकाणी पाहून शरद पवार आणि प्रतिभा पवार दोघेही भावुक झाले. यावेळी त्यांनी विद्या प्रतिष्ठानचे विश्वस्त किरण गुजर यांच्याशी अजित पवारांच्या स्मारकाबाबत चर्चा केली.

मुंबईकडे प्रवास करण्यापूर्वी शरद पवार या ठिकाणी आले होते. स्मारकाबाबत चर्चेनंतर थोड्याच वेळात ते मार्गस्थ झाले. त्यावेळी किरण गुजर यांनी पत्रकारांशी बोलताना सांगितले की, ''अजित दादांचे स्मारक भव्यदिव्य व्हावे, अशी साहेबांची इच्छा आहे.

बारामतीत विविध संकल्पनेतून अनेक इमारती बांधलेल्या आहेत आणि त्या वेगवेगळ्या दृष्टिकोनातून उभारलेल्या आहेत. अजित पवारांचे स्मृतिस्थळदेखील अत्यंत भव्यदिव्य व्हावे, अशी आमची इच्छा आहे. बारामतीसह राज्यभरातील वास्तूंविषयी चर्चा करून आणि त्यांच्याकडून आलेख घेऊन आम्हाला अत्यंत चांगल्या प्रकारचे स्मृतिस्थळ बनवायचे आहे. याच चर्चेचा भाग शरद पवार आणि प्रतिभा पवार यांनी केल्याचे गुजर म्हणाले.