पुणे महापालिकेने २ महिन्यांत थांबविले २२० बांधकाम; वायुप्रदूषण रोखण्यासाठी नियमांची पूर्तता न केल्याचा परिणाम

मध्यवर्ती भागासह शहराच्या उपनगरांमध्ये मोठ्या प्रमाणात बांधकामे सुरू आहेत. विश्रांतवाडी, गणेशखिंड रस्ता यासह अन्य भागात उड्डाणपूल, रस्ते, मेट्रोची कामे सुरू आहेत

राजू हिंगे 

पुणे : पुण्यातील वाढते वायुप्रदूषण रोखण्यासाठी पुणे महापालिकेने ५ हजार चौरस मीटरवरील बांधकामांना बांधकाम करताना विविध नियमांची पूर्तता करणे बंधनकारक केले आहे. पण नियमांची पूर्तता न करताच बांधकाम करणाऱ्या २२० बांधकाम प्रकल्पांना दोन महिन्यांत कामे थांबविण्याच्या नोटिसा दिल्या आहेत. त्यापैकी १९३ बांधकाम प्रकल्पांना सर्व नियमांची पूर्तता केली आहे. त्यामुळे बांधकाम प्रकल्पांवरील स्थगिती उठविली आहे. मात्र, अद्यापही २७ बांधकाम प्रकल्पांना कामे थांबविण्याची नोटीस कायम आहे.

मध्यवर्ती भागासह शहराच्या उपनगरांमध्ये मोठ्या प्रमाणात बांधकामे सुरू आहेत. विश्रांतवाडी, गणेशखिंड रस्ता यासह अन्य भागात उड्डाणपूल, रस्ते, मेट्रोची कामे सुरू आहेत. या कामामुळे मोठ्या प्रमाणात धूळ उडत आहे. यामुळे शहरात धोकादायक धूलिकणांचे प्रमाण वाढले आहे. बांधकाम व रस्त्यांसह इतर कामांच्या ठिकाणी होणाऱ्या धुळीमुळे शहरातील हवा प्रदूषित झाली आहे. यामुळे नागरिकांना फुफ्फुस, रक्तवाहिन्या, डोळ्यांसंबंधित आजार होत आहेत. त्यामुळे प्रदूषण कमी करण्यासाठी महाराष्ट्र प्रदूषण नियंत्रण महामंडळाने (एमपीसीबी) लागू केलेल्या मार्गदर्शक सूचना पालिकेने सर्व बांधकाम प्रकल्पांना बंधनकारक केल्या आहेत, पण त्याकडे दुर्लक्ष करणाऱ्या बांधकाम विभागातील अभियंत्यांनी सर्वेक्षण करून उपाययोजना न केलेल्या २२० बांधकाम प्रकल्पांना गेल्या दोन महिन्यांत कामे थांबवा अशी नोटीस बजावली. त्यानंतर सर्व नियमांची पूर्तता करून १९३ बांधकाम प्रकल्पांची कामे सुरू झाली आहेत, असे पुणे महापालिकेचे शहर अभियंता अनिरुद्ध पावसकर यांनी सांगितले.

बांधकामावरील हवेच्या गुणवत्तेचा डॅशबोर्ड दिसणार ऑनलाईन

पुणे महापालिकेच्या हद्दीतील १५० बांधकाम प्रकल्पावर सध्या सेन्सर बसविले आहेत. आता सेन्सरचा डॅशबोर्ड आता ऑनलाइनपणे महापालिकेच्या पर्यावरण विभागामध्ये दिसणार आहे. त्यामुळे पालिकेच्या या प्रकल्पावरील हवा प्रदूषणावर ऑनलाइनरीत्या देखरेख ठेवता येणार आहे.

हवेची गुणवत्ता सुधारण्यासाठी महापालिका करणार उपाययोजना

पुण्यातील वाढत्या वायुप्रदूषणावर उपाययोजना करण्यासाठी महापालिका आणि भारतीय उष्ण कटिबंधीय हवामानशास्त्र संस्था (आयआयटीएम) यांच्या अधिकाऱ्यांची संयुक्त समिती स्थापन करण्यात येणार आहे. या समितीमध्ये महापालिकेचे अधिकारी आणि ४ हवामान शास्त्रज्ञांचा समावेश आहे. ही समिती शहरातील वायुप्रदूषणावर लक्ष ठेवून ते कमी करून हवेची गुणवत्ता सुधारण्यासाठी उपाययोजना सुचवणार आहे. वायुप्रदूषण नियंत्रणासाठी सविस्तर कार्य आराखडा तयार करून त्याची शास्त्रीय पद्धतीने अंमलबजावणी करण्यात येणार आहे. अंमलबजावणीसाठी तीन, सहा आणि बारा महिन्यांचे टप्पे निश्चित करण्यात येणार आहे. आयआयटीएमकडून वायुप्रदूषण कमी करण्यासाठी आवश्यक उपाययोजना सुचविण्यात येणार आहेत.