पुण्यात अजित पवार गटाची जोरदारातयारी सुरू; दोन माजी उपमहापौरांचा पक्षप्रवेश, शरद पवार गटाला मोठा धक्का

विशेषतः हडपसर विधानसभा मतदारसंघात, जो अनेक वर्षांपासून राष्ट्रवादी काँग्रेसचा बालेकिल्ला मानला जातो, तिथे अजित पवार यांच्या नेतृत्वाखालील राष्ट्रवादी काँग्रेसने जोरदार मोर्चेबांधणी सुरू केली आहे.

पुणे - आगामी महापालिका निवडणुकीच्या पार्श्वभूमीवर पुणे शहरातील राजकारणात मोठी हालचाल सुरू झाली आहे. विशेषतः हडपसर विधानसभा मतदारसंघात, जो अनेक वर्षांपासून राष्ट्रवादी काँग्रेसचा बालेकिल्ला मानला जातो, तिथे अजित पवार यांच्या नेतृत्वाखालील राष्ट्रवादी काँग्रेसने जोरदार मोर्चेबांधणी सुरू केली आहे.

हडपसर हा मतदारसंघ महापालिकेच्या निवडणुकांमध्ये राष्ट्रवादीसाठी सर्वाधिक यशस्वी ठरलेला असून, 2017 मध्ये झालेल्या निवडणुकीत एकट्या हडपसर मतदारसंघातून 17 ते 18 नगरसेवक निवडून आले होते. 2019 च्या विधानसभा निवडणुकीत एकत्र असलेल्या राष्ट्रवादी काँग्रेसकडून चेतन तुपे आमदार म्हणून निवडून आले. राष्ट्रवादी काँग्रेसच्या फाटाफुटीनंतरही अजित पवार यांच्या गटाने या मतदारसंघावर आपले वर्चस्व टिकवून ठेवले आहे.

आता हे वर्चस्व अधिक मजबूत करण्यासाठी अजित पवार पावलं उचलत असून, शरद पवार गटातील दोन माजी उपमहापौर आणि एक माजी नगरसेवक यांना आपल्या गोटात खेचले आहे. हडपसरमधील माजी उपमहापौर निलेश मगर आणि बंडू तात्या गायकवाड हे आज अधिकृतरित्या अजित पवार यांच्या राष्ट्रवादी काँग्रेसमध्ये प्रवेश करत आहेत. त्यांच्यासोबत माजी नगरसेवक योगेश ससाने यांचाही पक्षप्रवेश होणार आहे.

ही घटना शरद पवार गटासाठी मोठा धक्का मानली जात असून, विशेष म्हणजे याच मतदारसंघातून शरद पवार गटाचे शहराध्यक्ष प्रशांत जगताप हे येतात. त्यांच्या मतदारसंघातूनच अशा महत्त्वाच्या नेत्यांनी अजित पवार गटात प्रवेश केल्याने, प्रशांत जगताप यांच्यासाठी देखील मोठा धक्का मानला जातो.