Video: पुण्यात दबक्या पावलांनी आला अन् लॅपटॉप घेऊन पळाला, चोरट्याचा प्रताप CCTV कॅमेरात कैद

- संधीचा फायदा घेत अज्ञात चोरट्याने शांतपणे रूममध्ये प्रवेश केला आणि आत ठेवलेले तीन महागडे लॅपटॉप चोरून नेले.

पुणे : शहरातील वाघोली परिसरात निष्काळजीपणाचा फायदा घेत चोरट्याने लॅपटॉप चोरी केल्याची घटना समोर आली आहे. बाईफ रोडवरील आयडीबीआय बँकेजवळ असलेल्या एका रूममध्ये घडलेल्या या प्रकारामुळे परिसरात भीतीचे वातावरण निर्माण झाले आहे.

अधिकच्या माहितीनुसार, सकाळी सुमारे साडेसातच्या दरम्यान संबंधित युवक जिमसाठी बाहेर पडताना रूमचा दरवाजा पूर्णपणे लॉक न करता फक्त लोटून गेला होता. याच संधीचा फायदा घेत अज्ञात चोरट्याने शांतपणे रूममध्ये प्रवेश केला आणि आत ठेवलेले तीन महागडे लॅपटॉप चोरून नेले.

ही संपूर्ण घटना सीसीटीव्ही कॅमेऱ्यात स्पष्टपणे कैद झाली असून फुटेजमध्ये चोरट्याची हालचाल दिसून येत आहे. घटनेची माहिती मिळताच वाघोली पोलिसांनी तात्काळ घटनास्थळी धाव घेत तपास सुरू केला आहे. सीसीटीव्हीच्या आधारे संशयिताचा शोध घेण्याचे काम वेगाने सुरू असून लवकरच आरोपीला अटक करण्यात येईल, असा पोलिसांचा विश्वास आहे. दरम्यान, या घटनेमुळे नागरिकांनी घराबाहेर पडताना दरवाजे व्यवस्थित लॉक करण्याचे आवाहन पोलिसांकडून करण्यात आले आहे.