सात महिन्यांच्या बालकाचे अपहरण प्रकरण:पुणे रेल्वे स्थानकावरून बालकाची सुखरूप सुटका

बिहारमधील हाजीपूर येथून अपहरण करण्यात आलेल्या ७ महिन्यांच्या बालकाची पुणे रेल्वे स्थानकावरून सुखरूप सुटका करण्यात आली असून, या प्रकरणी एका महिलेला अटक करण्यात आली आहे

पुणे : बिहारमधील हाजीपूर येथून अपहरण करण्यात आलेल्या ७ महिन्यांच्या बालकाची पुणे रेल्वे स्थानकावरून सुखरूप सुटका करण्यात आली असून, या प्रकरणी एका महिलेला अटक करण्यात आली आहे. ही कारवाई रेल्वे सुरक्षा दल (आरपीएफ) पुणे पोलिस ठाणे यांच्यामार्फत २३ जून रोजी करण्यात आली.

याबाबत पुणे रेल्वे पोलिसांकडून मिळालेल्या माहितीनुसार, जीआरपी हाजीपूर आणि विभागीय नियंत्रण कक्षामार्फत दिलेल्या निर्देशानुसार एका पुरुष आणि एका महिलेकडून हाजीपूर येथून बालकाचे अपहरण करण्यात आले होते. या दोघांची मोबाइल लोकेशन पुणे रेल्वे स्थानक परिसरात सापडल्याने, पुणे येथील आरपीएफला तत्काळ सूचना देण्यात आली.

सूचना मिळताच आरपीएफ पुणे ठाण्याचे अधिकारी व कर्मचाऱ्यांनी युद्धपातळीवर शोध मोहीम राबवली. विविध पथके तयार करून संपूर्ण रेल्वे स्थानक परिसरात, विशेषतः फलाट क्रमांक ३ आणि महत्त्वाच्या प्रवेश व निर्गम मार्गांवर पथके तैनात करण्यात आली. तपासादरम्यान, दोन संशयित व्यक्ती फलाट क्रमांक ३ वर आढळले. त्यांना ताब्यात घेऊन आरपीएफ ठाणे, पुणे येथे चौकशीसाठी आणण्यात आले. चौकशीत त्यांनी आपली नावे मुन्ना कुमार राजभर (२४ , रा. कोपा समोता, छपरा, बिहार) आणि पूनम देवी (३० वर्षे, रा. दया छपरा, सिवान, बिहार) अशी सांगितली.

बालकाबाबत विचारले असता, त्यांनी कोणतीही कायदेशीर कागदपत्रे सादर केली नाहीत. त्यांचे व बालकाचे फोटो जीआरपी हाजीपूरला पाठविण्यात आले असता, हे दोघेही अपहरण प्रकरणात वॉंटेड असल्याचे निष्पन्न झाले. त्यानंतर पूनम देवीला अटक करण्यात आली आणि बालकाला सुखरूपपणे ताब्यात घेण्यात आले. सद्य:स्थितीत दोघे आरोपी आणि बालक आरपीएफ पुणे ताब्यात आहेत. पीआरपी हाजीपूर येथून पोलिस पथक पुण्याकडे रवाना झाले असून, त्यांच्याकडे आरोपी व बालक यांना पुढील कायदेशीर कार्यवाहीसाठी सुपुर्द करण्यात येणार आहे.