चिनी गुन्हेगारासोबत संगनमत करून चित्रपट निर्माता असा करायचा फसवणूक

यूट्यूबवर शेअर केलेल्या स्टॉक मार्केट संदर्भातील व्हिडीओखालील व्हॉट्सॲप लिंकवरून गुंतवणुकीचे आमिष दाखवणाऱ्या ॲबॉट वेल्थ नावाच्या ॲपवर नोंदणी केली होती.

पिंपरी : चिनी नागरिकाच्या संपर्कात राहून सायबर फसवणुकीसाठी आपले बँक खाते पुरवणाऱ्या चित्रपट निर्मात्याला पिंपरी-चिंचवडच्या सायबर गुन्हे शाखेने अटक केली आहे. या प्रकरणात ८६ लाखांहून अधिक रुपयांची फसवणूक झाल्याचे निष्पन्न झाले.

शिवम बाळकृष्ण संवत्सरकार (रा. एरंडवणे, पुणे), असे संशयिताचे नाव असून, तो स्वत:ला चित्रपट निर्माता असल्याचे सांगतो; परंतु तपासादरम्यान त्याने चिनी नागरिक बाम्बिनी याच्याशी संपर्कात राहून बँक खात्याचा गैरवापर केल्याचे समोर आले आहे.

फिर्यादी यांनी यूट्यूबवर शेअर केलेल्या स्टॉक मार्केट संदर्भातील व्हिडीओखालील व्हॉट्सॲप लिंकवरून गुंतवणुकीचे आमिष दाखवणाऱ्या ॲबॉट वेल्थ नावाच्या ॲपवर नोंदणी केली होती. सुरुवातीला ५०० रुपयांची गुंतवणूक करून त्यांना काही दिवसांत पाच कोटी १५ लाखांचा नफा असल्याचे दाखवण्यात आले; पण पैसे काढण्याचा प्रयत्न करताच विविध चार्जेसच्या नावाखाली पैशांची मागणी होऊ लागली. त्यावरून संशय बळावल्यानंतर त्यांनी सायबर पोलिस ठाण्यात ५७ लाख ७० हजार ६७० रुपयांची फसवणूक झाल्याची तक्रार दाखल केली.

बँक खात्याचा तपास आणि संशयिताचा शोध

तपासादरम्यान संशयिताने वापरलेले आयडीएफसी बँकेतील खाते हे ‘बालाजी एंटरप्रायजेस’ या नावाने सुरू करण्यात आले होते. पोलिस उपनिरीक्षक सागर गोमन आणि त्यांच्या पथकाने डेक्कन पोलिस ठाण्याच्या मदतीने संशयिताचा शोध घेतला. सुरुवातीला तो ‘मी चित्रपट निर्माता आहे, अशा गोष्टी कशा करीन?’ असे उत्तर देत होता. मात्र, पोलिस निरीक्षक प्रवीण स्वामी यांनी विश्वासात घेऊन केलेल्या सखोल तपासात त्याने चिनी संशयिताच्या सांगण्यानुसार खाते उघडले व फसवणुकीसाठी वापरले, हे कबूल केले.

खात्यावर १५ पेक्षा जास्त फसवणुकीच्या तक्रारी

तपासात उघड झाले की संशयिताच्या खात्यावर एकूण ८६ लाख ४३ हजार १११ रुपये जमा झाले होते आणि त्या खात्यावर १५ पेक्षा जास्त फसवणुकीच्या तक्रारी प्राप्त झाल्या आहेत. संशयिताच्या मोबाइलमध्ये आणखी दोन बँक खाती फसवणुकीसाठी तयार केल्याचे पुरावे मिळाले आहेत. वेळीच अटक केल्यामुळे इतर अनेक लोकांची फसवणूक टळली, असे पोलिसांनी सांगितले. संशयिताकडून दोन मोबाइल फोन जप्त करण्यात आले असून बँक खात्याची माहिती तपासणीसाठी घेतली आहे. तसेच चिनी नागरिक बाम्बिनी आणि इतर सहआरोपींचा शोध सुरू आहे. पोलिस निरीक्षक रविकिरण नाळे तपास करीत आहेत.