ईद साजरी करून नुकताच गेला कर्तव्यावर, विमान अपघातात पुण्याचा क्रू मेंबर इरफानचा मृत्यू, कुटुंबावर दुःखाचा डोंगर

अत्यंत मनमिळावू असलेला इरफान नुकताच ईद साठी घरी येऊन पुन्हा कर्तव्यावर गेला होता

पुणे : अहमदाबादमधील एअर इंडियाच्या विमानअपघातात २६५ जणांचा मृत्यू झाला आहे. अहमदाबादचे पोलीस उपायुक्त कानन देसाई यांनी ही माहिती दिली आहे. विमानामध्ये एकूण २४२ जण प्रवास करत होते, त्यापैकी एक ब्रिटीश नागरिक चमत्कारीकरित्या बचावला आहे. देसाई यांनी सांगितलेला आकडा हा विमानातील प्रवाशांपेक्षाही खूप जास्त आहे. यामुळे यात बीजे मेडिकल कॉलेजच्या इंटर्न डॉक्टर आणि कर्मचाऱ्यांचा समावेश असण्याची दाट शक्यता आहे. 

या घटनेत १२ क्रू मेंबर्स होते. तर महाराष्ट्रातील ९ प्रवाशांचा समावेश असल्याची माहिती समोर आली आहे. अशातच अहमदाबाद मध्ये झालेल्या दुर्दैवी विमान अपघातात इरफान शेख या २२ वर्षीय क्रू मेंबरचा दुर्दैवी मृत्यू झाल्याची वेदनादायक बातमी समोर आली आहे. ईद साजरी करून नुकताच इरफान कर्तव्यावर गेला असताना काळाने घाला घातला आणि त्याचा अंत झाला. या घटनेने इरफानच्या कुटुंबियांवर दुःखाचा डोंगर कोसळला आहे. 

कालच गुजरातच्या अहमदाबाद मध्ये झालेल्या दुर्दैवी विमान अपघाताने संपूर्ण देशातून हळहळ व्यक्त केली जात आहे. २४२ कुटुंबावर दुःखाचा डोंगर कोसळला आहे. या घटनेत मृत्यू पावलेल्या प्रवाशांमध्ये लहान मुलापासून ते ज्येष्ठापर्यंत सगळ्यांचा समावेश आहे. पुण्यातील इरफान शेख हा तरुणही क्यू मेंबर म्हणून कर्तव्यावर गेला होता. पण त्याचा अवघ्या २२ व्या वर्षी दुर्दैवी अंत झाला. इरफान हा पिंपरी चिंचवड च्या संत तुकाराम नगर मध्ये राहायला होता. आजी आजोबा आई वडील भाऊ अस कुटुंब असलेला इरफान दोन वर्षापासून एअर इंडिया मध्ये कामाला लागला होता. अत्यंत मनमिळावू असलेला इरफान नुकताच ईद साठी घरी येऊन पुन्हा कामाला गेला होता. त्याच्या जाण्याने त्यांच्या नातेवाईकांना धक्का बसला आहे. त्याचा मृतदेह लवकरात लवकर मिळावा अशी मागणी त्याचे नातेवाईक करत आहेत.

असा झाला  अपघात 

विमान समुद्रसपाटीपासून ६२५ फूट उंचीवर गेल्यावर इंजिन बंद पडले आणि विमान खाली कोसळले. विमानतळावरून उड्डाण केल्याने विमानतळाची हद्द ओलांडून विमान पुढे गेले होते. रहिवाशी भागात असलेल्या बीजे मेडिकल क़ॉलेजच्या हॉस्टेलच्या इमारतीवर हे विमान आदळले असल्याची माहिती पोलिसांनी दिली आहे.