पुणे: यकृत प्रत्यारोपण शस्त्रक्रियेनंतर पती-पत्नीचा मृत्यू झाल्याने निर्माण झालेल्या गंभीर परिस्थितीचा आढावा घेत आरोग्य विभागाच्या उच्चस्तरीय समितीने सह्याद्री रुग्णालयाला उपचारात त्रुटी आढळल्या नसल्याचे स्पष्ट केले आहे. याबाबतचा सविस्तर अहवाल सादर करत समितीने रुग्णालयाला एक प्रकारे ‘क्लीन चिट’ दिली असून, प्रत्यारोपण शस्त्रक्रियांवरील स्थगितीही मागे घेण्यात आली आहे. मात्र पोलिसांकडील वैद्यकीय हलगर्जीची चौकशी अद्याप निर्णायक टप्प्यावर पोहोचलेली नाही.
डेक्कन परिसरातील सह्याद्री रुग्णालयात १५ ऑगस्ट रोजी यकृत प्रत्यारोपणानंतर बापू कोमकर यांचा मृत्यू झाला होता. दाता असलेल्या त्यांच्या पत्नी कामिनी कोमकर यांचेही २२ ऑगस्ट रोजी निधन झाले. या दोन मृत्यूमुळे कुटुंबीयांनी रुग्णालयावर गंभीर निष्काळजीपणाचे आरोप करत पोलिसांकडे तक्रार दाखल केली होती. प्रकरणाच्या गांभीर्याचा विचार करून आरोग्य विभागाने यकृत प्रत्यारोपण तज्ज्ञ डॉ. मोहम्मद रेला यांच्या अध्यक्षतेखाली आठसदस्यीय उच्चस्तरीय चौकशी समिती स्थापन केली होती.
समितीने रुग्णालयातील सर्जरी प्रक्रिया, उपचार पद्धती, वापरलेली उपकरणे, तसेच रुग्णांच्या आरोग्यस्थितीचा सर्वांगीण अभ्यास करून गेल्या महिन्यात विभागाकडे अहवाल सादर केला. याचा आढावा घेण्यासाठी आरोग्य सचिवांच्या अध्यक्षतेखाली १८ सदस्यीय राज्य सल्लागार समितीची बैठक ६ नोव्हेंबर रोजी मंत्रालयात घेण्यात आली. समितीने सह्याद्री रुग्णालयाची बाजू ग्राह्य धरत उपचारात कोणतीही त्रुटी नसल्याचे निष्कर्ष नोंदवले. यानुसार, रुग्णालयातील यकृत प्रत्यारोपण शस्त्रक्रियांवरील स्थगिती मागे घेण्याचे आदेश २७ नोव्हेंबरपासून लागू करण्यात आले.
दरम्यान, कोमकर कुटुंबीयांनी केलेल्या तक्रारीवर डेक्कन पोलिस ठाण्याने स्वतंत्र वैद्यकीय मत मागविण्यासाठी ससून रुग्णालयाशी संपर्क साधला होता. मात्र संबंधित तज्ज्ञ उपलब्ध नसल्याचे कारण देत ससून प्रशासनाने चौकशीस नकार दिला. परिणामी प्रकरण मुंबईतील जे. जे. रुग्णालयाकडे पाठविण्यात आले असून, तेथील समिती वैद्यकीय हलगर्जीबाबत स्वतंत्र तपास करत आहे. पोलिसांकडील ही चौकशी अद्याप सुरूच आहे. आरोग्य विभागाच्या समितीने सह्याद्री रुग्णालयाला दिलेली क्लीन चिट दिली असली, तरी अंतिम निष्कर्षासाठी जे. जे. रुग्णालयाच्या अहवालाकडे सर्वांचे लक्ष लागले आहे.
यकृत प्रत्यारोपणानंतर पती-पत्नीच्या मृत्यूबाबत चौकशी करताना रुग्णांच्या उपचारांत कोणतीही त्रुटी नसल्याचे समितीच्या अहवालात नमूद आहे. - डॉ. भगवान पवार, उपसंचालक, आरोग्य सेवा, पुणे.
Web Summary : Sahyadri Hospital cleared in couple's liver transplant deaths; no treatment errors found. Transplant surgeries resume. Police probe continues. JJ Hospital report awaited.
Web Summary : पुणे के सह्याद्री अस्पताल को दंपती की लीवर प्रत्यारोपण के बाद हुई मौत के मामले में क्लीन चिट मिली। पुलिस जांच जारी है, जेजे अस्पताल की रिपोर्ट का इंतजार है।