धनकवडी परिसरात डंपरच्या धडकेत दुचाकीस्वार तरुणीचा जागीच मृत्यू

- तरुणी दुचाकीवरून जात असताना कात्रज कचरा रॅम्पच्या दिशेने येणाऱ्या डंपरने तिच्या दुचाकीला धडक दिली.

धनकवडी - धनकवडी परिसरात कात्रज डेअरी जवळ आज सकाळी अपघात घडला. दुचाकीवरून प्रवास करणाऱ्या एका तरुणीला डंपरने जोरदार धडक दिल्याने तिचा जागीच मृत्यू झाला. या घटनेमुळे परिसरात हळहळ व्यक्त करण्यात येत आहे.

पोलीसांनी दिलेल्या माहितीनुसार, तरुणी दुचाकीवरून जात असताना कात्रज कचरा रॅम्पच्या दिशेने येणाऱ्या डंपरने तिच्या दुचाकीला धडक दिली. धडकेनंतर स्थानिकांनी तत्काळ धाव घेत मदत करण्याचा प्रयत्न केला, मात्र तरुणीचा जागीच मृत्यू झाला. घटनेची माहिती मिळताच पोलिस घटनास्थळी दाखल झाले असून पंचनामा करून पुढील तपास सुरू आहे. डंपर चालकाविरोधात गुन्हा दाखल करण्याची प्रक्रिया सुरू असल्याचे समजते. 

दरम्यान, सकाळच्या वेळीच झालेल्या या अपघातामुळे स्थानिक नागरिकांनी वाहतूक व्यवस्थेवर नाराजी व्यक्त केली. कात्रज परिसरात वाढती वाहतूक, बेकायदेशीर पार्किंग आणि अवजड वाहनांची बेफाम धाव यामुळे अपघातांचे प्रमाण वाढत असल्याची तक्रार करण्यात आली.