पंतप्रधान नरेंद्र मोदींचा शरद पवारांना फोन; तब्येतीची विचारपूस केली

शरद पवार यांची प्रकृती सध्या स्थिर असून त्यांच्यात चांगली सुधारणा होत असल्याची माहिती रुबी हॉल क्लिनिकच्या डॉक्टरांनी दिली आहे

पुणे : राष्ट्रवादीचे (शरद पवार) अध्यक्ष ज्येष्ठ नेते शरद पवार यांना श्वास घेण्यात त्रास होत असल्याच्या कारणास्तव सोमवारी (दि. ९) दुपारी साडेतीनच्या सुमारास पुण्यातील रुबी हॉल क्लिनिकमध्ये दाखल करण्यात आले. रुबीचे संचालक डॉ. सायमन ग्रॅण्ट यांच्या मार्गदर्शनाखाली पवार यांची प्राथमिक तपासणी करण्यात आली. प्राथमिक तपासणीत काही चाचण्या सामान्य असल्याचे निदर्शनास आले असून, शरद पवार यांची प्रकृती स्थिर असल्याचे रुग्णालय प्रशासनाकडून सांगण्यात आले. 

 गेल्या काही दिवसांतील सततच्या धावपळीमुळे त्यांना शारीरिक थकवा जाणवत होता. छातीत थोडा कफ असल्याने श्वसन तपासणीही करण्यात आली आहे. सध्या त्यांना खासगी कक्षात ठेवण्यात आले होते. आज सकाळी शरद पवार यांची प्रकृती सध्या स्थिर असून त्यांच्यात चांगली सुधारणा होत असल्याची माहिती रुबी हॉल क्लिनिकचे फिजिशियन व विश्वस्त डॉ. सायमन ग्रँट यांनी दिली. पवार यांचे सर्व जीवनसत्त्वीय निकष (व्हायटल पॅरामिटर्स) सामान्य मर्यादेत असून त्यांची एकूण प्रकृती स्थिर आणि सुधारत असल्याचे त्यांनी स्पष्ट केले. रुग्णालयात दाखल होताना जाणवलेला सौम्य त्रास उपचारांमुळे आता कमी झाला आहे. खबरदारीचा उपाय म्हणून त्यांना अद्याप निरीक्षणाखाली ठेवण्यात आले आहे. रुबी हॉल क्लिनिकच्या ठराविक वैद्यकीय प्रोटोकॉलनुसार त्यांच्यावर उपचार सुरू असून सर्व तपासण्या नियमितपणे करण्यात येत आहेत. पुढील उपचारांबाबतचे निर्णय पवार यांच्या प्रकृतीतील प्रगती लक्षात घेऊन घेण्यात येणार असल्याचे रुग्णालय प्रशासनाने सांगितले.

त्यानंतर आज सकाळी शरद पवारांच्या तब्येतीची विचारणा करण्यासाठी पंतप्रधान नरेंद्र मोदी यांचा शरद पवारांना फोन केल्याची माहिती समोर आली आहे. पंतप्रधान मोदींनी शरद पवारांच्या तब्येतीची विचारपूस केली आहे. शरद पवारांच्या तब्येतीत सुधारणा झाल्याने संध्याकाळी किंवा उद्या डिस्चार्ज दिला जाणार असल्याची शक्यता आहे.