बारामतीत पवार कुटुंबीय एकाच व्यासपीठावर, पण अजित पवार ‘माळेगाव’च्या प्रचारात व्यस्त

या कार्यक्रमाच्या निमित्ताने पवार कुटुंबीय एकत्र येणार असल्याने सर्वांचे या कार्यक्रमाकडे लक्ष होते हे विशेष.

बारामती : विद्या प्रतिष्ठानचे अध्यक्ष ज्येष्ठ नेते शरद पवार यांच्यासह संस्थेच्या विविध पदांवर कार्यरत असणारे पवार कुटुंबीय शुक्रवारी (दि. २०) ‘एआय’ कार्यशाळेच्या निमित्ताने एकत्र आल्याचे पाहावयास मिळाले. मात्र, माळेगाव कारखाना निवडणुकीच्या प्रचारात व्यस्त असलेले उपमुख्यमंत्री अजित पवार कार्यक्रमाला अनुपस्थित असल्याचे चित्र होते. या कार्यक्रमाच्या निमित्ताने पवार कुटुंबीय एकत्र येणार असल्याने सर्वांचे या कार्यक्रमाकडे लक्ष होते हे विशेष.

शरद पवार संस्थेचे अध्यक्ष आहेत. तर खासदार सुप्रिया सुळे, सुनेत्रा पवार, उपमुख्यमंत्री अजित पवार, युगेंद्र पवार हे विश्वस्त असल्याने अजित पवार वगळता सर्वजण कार्यक्रमासाठी उपस्थित होते. यावेळी व्यासपीठावर खासदार सुळे आणि सुनेत्रा पवार यांच्यात गप्पा रंगल्याचे चित्र होते. अजित पवार यांचेदेखील निमंत्रण पत्रिकेत नाव आहे. त्यांनी या ठिकाणी येणे अपेक्षित होते. मात्र, आयोजित एआय कार्यक्रमाला त्यांनी दांडी मारल्याचे दिसून आले. कार्यक्रम टाळत ‘माळेगाव’च्या प्रचारात व्यस्त राहणे त्यांनी पसंत केले. एकीकडे बारामतीत विद्या प्रतिष्ठानचा कार्यक्रम सुरू असताना उपमुख्यमंत्री पवार यांनी माळेगावच्या कार्यक्षेत्रात कार्यकर्ते, मतदारांशी गाठीभेटी घेण्यास प्राधान्य दिल्याचे पाहावयास मिळाले. अनुपस्थितीमुळे अजित पवार यांनी माळेगाव कारखाना निवडणूक गांभीर्याने घेतल्याचे अधोरेखित झाले. माळेगाव कारखान्याच्या निवडणुकीच्या आखाड्यात उपमुख्यमंत्री पवार हे ‘ब’ वर्गातून स्वत: उतरले आहेत. केवळ स्वत:ची उमेदवारी जाहीर करून ते थांबले नाहीत, तर आगामी पाच वर्षे ‘माळेगाव’चा अध्यक्ष म्हणून आपणच कारभार पाहणार असल्याची महत्त्वपूर्ण घोषणा पवार यांनी केली आहे.

अजित पवार यांनी निवडणुकीची सूत्रे हातात घेत स्वत: तळ ठोकून आहेत. अजित पवार आणि गुरू-शिष्य चंद्रराव तावरे, रंजन तावरे यांच्यात एकमेकांवर आरोप-प्रत्यारोपाच्या फैरी सुरू आहेत. दुसरीकडे शरद पवार गटदेखील माळेगावच्या आखाड्यात उतरला आहे. शरद पवार गटाचे २० उमेदवार निवडणुकीच्या रिंगणात आहेत. खासदार सुप्रिया सुळे, युगेंद्र पवार यांनी या निवडणुकीची सूत्रे हाती घेतली आहेत. त्यामुळे माळेगावच्या कार्यक्षेत्रातील ३७ गावांचे राजकारण चांगलेच तापले आहे.