Organ Donation: यकृत, डोळे प्रत्यारोपणासाठी मिरज-पुणे ग्रीन कॉरिडॉर
By ऑनलाइन लोकमत | Updated: June 6, 2025 20:16 IST2025-06-06T20:15:52+5:302025-06-06T20:16:43+5:30
Pune News: मिरजेच्या सेवासदन रुग्णालयातून एका ७५ वर्षीय मृत रुग्णाच्या नातेवाइकांच्या संमतीने यशस्वी अवयवदान करण्यात आले.
Organ Donation: यकृत, डोळे प्रत्यारोपणासाठी मिरज-पुणे ग्रीन कॉरिडॉर
मिरजेतील रुग्णालयातून यकृत, मूत्रपिंड व डोळे असे तीन अवयव पुण्यातील रुग्णालयात पोहचविण्यासाठी बुधवारी सकाळी ग्रीन कॉरिडॉर करण्यात आला. अवघ्या सव्वा तीन तासात अवयव पोहचविण्यात यश आल्याने रुग्णाला जीवदान मिळाले.
'लोकमत'चं WhatsApp चॅनल फॉलो करा!
मिरजेच्या सेवासदन रुग्णालयातून एका ७५ वर्षीय मृत रुग्णाच्या नातेवाइकांच्या संमतीने यशस्वी अवयवदान करण्यात आले. यकृत, मूत्रपिंड व नेत्र (कॉर्निया) यांचे संकलन करून ग्रीन कॉरिडॉरद्वारे पुण्यातील सह्याद्री रुग्णालयात वेळेत पाठवण्यात आले.
या महत्त्वपूर्ण व जीवनदायी उपक्रमात मेंदूरोगतज्ज्ञ डॉ. केतकी पटवर्धन यांच्या मार्गदर्शनाखाली भूलतज्ज्ञ डॉ. दर्शना पांडे यांच्यासह वैद्यकीय पथकाच्या अचूक व वेगवान समन्वयाने हे काम तांत्रिकदृष्ट्या यशस्वी झाले. या मोहिमेसाठी आवश्यक प्रशासकीय पाठबळही मिळाले.
जिल्हा शल्यचिकित्सक डॉ. विक्रमसिंह कदम, जिल्हाधिकारी अशोक काकडे, पोलिस अधीक्षक संदीप घुगे यांनी आवश्यक परवानग्या, सुरक्षा व्यवस्था व वाहतूक नियंत्रणासाठी मदत केली.
मिरजेतून अवयव घेऊन जाणाऱ्या रुग्णवाहिकेस मिरज ते पुणेदरम्यान ग्रीन कॉरिडॉर उपलब्ध करून दिल्याने अवयव विनाअडथळा व गतीने पुण्यातील सह्याद्री हॉस्पिटलमध्ये पोहोचल्याने एकास नवजीवन मिळाले.
एका अमूल्य जिवाच्या रक्षणासाठी योगदान दिल्याबद्दल जिल्हा प्रशासन, जिल्हा आरोग्य यंत्रणा व पोलिसांचे सेवासदन रुग्णालयाने आभार मानले. यामुळे अवयवदानाबाबत समाजात जागरूकता वाढेल असे मत हॉस्पिटलचे संचालक डॉ. रविकांत पाटील यांनी व्यक्त केली.