किरण शिंदे
पुणे : कुख्यात गुंड शरद मोहोळ याच्यावर आज दिवसाढवळ्या गोळ्या झाडण्यात आल्या. शरद मोहोळ आपल्या सुतारदरा परिसरातील घरातून बाहेर पडला असताना दबा धरून बसलेल्या मारेकऱ्यांनी अचानक त्याच्यावर हल्ला केला. अगदी जवळून त्याच्या दिशेने गोळ्या झाडल्या. यातील चार गोळ्या लागल्याने शरद मोहोळ गंभीर जखमी झाला होता. उपचारादरम्यान त्याचा मृत्यू झाला. दरम्यान शरद मोहोळ याच्यावर गोळ्या झाडणार्‍या एका आरोपीची ओळख पटली आहे. साहिल उर्फ मुन्ना पोळेकर असे आरोपीचे नाव आहे. गुन्हे पोलिसांनी अवघ्या काही तासात आरोपीचे नाव निष्पन्न केले आहे. त्याच्या शोधासाठी आता पोलिसांची पथके रवाना झाली आहे.
शरद मोहोळ हा सुतारदरा परिसरात राहण्यासाठी होता. आज दुपारी दीड वाजण्याच्या सुमारास तो घरातून बाहेर पडला. त्यावेळी काही अज्ञात आरोपींनी त्याच्यावर गोळ्या झाडल्या होत्या. त्याला तातडीने खाजगी रुग्णालयात दाखल करण्यात आले होते. मात्र उपचार सुरू असताना त्याचा मृत्यू झाला. दरम्यान शरद मोहोळ याला रुग्णालयात दाखल केले असता त्याच्या समर्थकांनी मोठी गर्दी केली होती. त्यामुळे रुग्णालय परिसरात मोठा पोलीस बंदोबस्त ठेवण्यात आला होता. दरम्यान उपचार सुरू असताना त्याचा मृत्यू झाला. विश्वविच्छेदन झाल्यानंतर त्याच्या पार्थिवावर सायंकाळी अंत्यसंस्कार केले जाणार आहेत.
शरद मोहोळ पुण्यातील कुख्यात गुन्हेगार आहे. मोहोळवर हत्या, हत्येचा प्रयत्न, खंडणी, अपहरण यासारखे अनेक गुन्हे दाखल आहेत. पिंटू मारणे हत्येप्रकरणी त्याला अटक करण्यात आली होती. या खटल्यात तो जामिनावर बाहेर आला आणि दासवे गावचे सरपंच शंकर धिंडले यांचे त्याने अपहरण केल्या प्रकरणात त्याला पुन्हा अटक झाली. येरवडा कारागृहात शरद मोहोळने विवेक भालेराव याच्या साथीने दहशतवादी कृत्यांमध्ये सहभागाचा आरोप असलेल्या कतील सिद्दीकीचा खून केला. या प्रकरणात शरद मोहोळला जामीन मिळाला. मात्र बाहेर आल्यानंतर त्याची गुन्हेगारी कृत्य सुरुच होती. जुलै २०२२ मध्ये त्याला पुणे जिल्ह्यातून सहा महिन्यांसाठी तडिपार करण्यात आले होते.