कोणताही मंत्री येणार नाही; स्थानिक कार्यकर्त्यांनीच प्रचाराची धुरा सांभाळावी, रवींद्र चव्हाणांच्या सूचना

केंद्र आणि राज्य शासनाच्या माध्यमांतून झालेली विविध विकासकामे आणि शासकीय योजना लाभार्थ्यांपर्यंत पोहोचवा

पुणे : घरोघरी जाऊन प्रचार करा, छोट्या बैठका व मेळाव्यांवर भर द्या, स्थानिक पातळीवर प्रचार करा, अशा सूचना भाजप प्रदेशाध्यक्ष रवींद्र चव्हाण यांनी पक्षाच्या जिल्ह्यातील पदाधिकाऱ्यांना आणि उमेदवारांना केल्या आहेत.

पुणे जिल्हा परिषद निवडणुकीच्या पार्श्वभूमीवर चव्हाण यांच्या उपस्थितीत सोमवारी जिल्ह्यातील भाजपच्या प्रमुख पदाधिकाऱ्यांची बैठक घेतली. यावेळी उच्च व तंत्र शिक्षणमंत्री चंद्रकांत पाटील, प्रदेश सरचिटणीस राजेश पांडे, आमदार राहुल कुल, भीमराव तापकीर, पुणे दक्षिण जिल्हाध्यक्ष शेखर वढणे, पुणे उत्तर जिल्हाध्यक्ष प्रदीप कंद, माजी आमदार संजय जगताप आणि संग्राम थोपटे उपस्थिती होती. यावेळी दिवंगत उपमुख्यमंत्री अजित पवार यांना बैठकीत श्रद्धांजली वाहण्यात आली.

चव्हाण म्हणाले, प्रदेश स्तरावरील कोणताही मंत्री किंवा पदाधिकारी प्रचारासाठी येणार नाही. स्थानिक कार्यकर्त्यांनीच प्रचाराची धुरा सांभाळावी. पंतप्रधान नरेंद्र मोदी आणि मुख्यमंत्री देवेंद्र फडणवीस यांच्या नेतृत्वातील केंद्र आणि राज्य शासनाच्या माध्यमांतून झालेली विविध विकासकामे आणि शासकीय योजना लाभार्थ्यांपर्यंत पोहोचवा.

चंद्रकांत पाटील म्हणाले, भाजपची बूथ यंत्रणा सक्षम असून, त्या माध्यमातून प्रचार यंत्रणा अधिक प्रभावीपणे राबवावी. संघटनात्मक ताकद, कार्यकर्त्यांची मेहनत आणि विकासाच्या मुद्द्यांवर आधारित प्रचार यामुळे पक्षाला मोठे यश मिळेल.