निलेश चव्हाणला ७ जूनपर्यंत पोलीस कोठडी; पिता - पुत्रांना १४ दिवसांची न्यायालयीन कोठडी

निलेश चव्हाण काही संबंध नसताना बाळ का घेऊन गेला? हगवणे यांच्यासोबत काही आर्थिक व्यवहार झाले का? हे तपासायचे आहे

पुणे : वैष्णवी हगवणे आत्महत्या प्रकरणात निलेश चव्हाणला ७ जून पर्यंत पोलीस कोठडी तर सुशील आणि राजेंद्र हगवणे यांना १४ दिवसांची न्यायालयीन कोठडी सुनावण्यात आली आहे. फरार असलेला संशयित नीलेश चव्हाण याला पिंपरी-चिंचवड पोलिसांनी शुक्रवारी (३० मे) नेपाळ सीमेवरून अटक केले होते. त्यानंतर त्याला मंगळवार, ३ जूनपर्यंत पोलिस कोठडी सुनावली होती. तर सुशील आणि राजेंद्र हगवणे यांनाही पोलीस कोठडी सुनावण्यात आली होती. आज पुन्हा तिघांना न्यायालयात हजर केले असता न्यायालयीन आणि पोलीस कोठडीत वाढ करण्यात आली आहे.   

वैष्णवी हगवणे प्रकरणातील तीन आरोपींना कोर्टात हजर करण्यात आले होते. सासरा राजेंद्र हागवणे, दीर सुशील हगवणे आणि सह आरोपी असलेल्या निलेश चव्हाण यांना बावधन पोलिसांनी कोर्टात हजर केले होते.  तीन आरोपींची पोलीस कोठडी संपल्यानंतर न्यायालयात आज पुन्हा सुनावणी झाली.  पिंपरी चिंचवड पोलिसांना या तिन्ही आरोपीची एकत्रित चौकशी करायची असल्याकारणाने आज पुन्हा पोलीस कोठडी वाढवून मागण्यात आली. तिन्ही आरोपीचा मोबाईल जप्त करण्यात आला आहे.  

निलेशचा कटात सहभाग असल्याचं निष्पन्न झाल्याने त्याचा अधिक तपास करायचा आहे. अशी माहिती पोलिसांनी कोर्टात दिली आहे. तसेच काही संबंध नसताना बाळ का घेऊन गेला? याचा तपास करायचा आहे. हगवणे कुटुंबासोबत झालेलं तपासायचं आहे म्हणून पोलीस कोठडी मागण्यात आली. आरोपीच्या वकिलांनी यावेळी एकही नवीन मुद्दा  नसल्याचे सांगितले आहे. राजेंद्र आणि सुशीलला न्यायालयीन कोठडीची मागणी केली आहे. या सगळ्या छळाच्या प्रकरणात निलेश चव्हाण आणि हगवणे कुटुंब यांचे काही आर्थिक व्यवहार होते का हे तपासायचे आहे. अशी माहिती पोलिसांनी न्यायालयात दिली. या युक्तिवादानंतर सुशील आणि राजेंद्र हगवणे यांना 14 दिवसांची न्यायालयीन कोठडी तर निलेश चव्हाणला ७ तारखेपर्यंत पोलीस कोठडी सुनावण्यात आली आहे. 

निलेश चव्हाणच्या पोलीस कोठडीत वाढ

वैष्णवीच्या कुटुंबीयांना धमकावणे, तिच्या मुलाला बळजबरीने ठेवणे, आणि शस्त्र दाखवून धमकी देणे असे गंभीर आरोप नीलेश चव्हाण याच्या विरोधात होते. तसेच त्याच्याकडून शशांक, लता आणि करिष्मा यांचे मोबाईलही जप्त करण्यात आले होते. आता त्या मोबाईलमधून वैष्णवीच्या छळाचे चॅट्स मिळण्याची शक्यता पोलिसांनी वर्तवली होती. त्या अनुषंगाने पोलीस कोठडीत वाढ करण्यात आली होती. अजूनही काही पुरावे मिळण्याची शक्यता असल्याने पुन्हा एकदा निलेश चव्हाणच्या पोलीस कोठडीत वाढ करण्यात आली आहे. 

पिता पुत्रांना १४ दिवसांची न्यायालयीन कोठडी 

राजेंद्र हगवणे आणि सुशील हगवणे यांना न्यायालयाने १४ दिवसांची न्यायालयीन कोठडी सुनावली आहे.या सगळ्या छळाच्या प्रकरणात निलेश चव्हाण आणि हगवणे कुटुंब यांचे काही आर्थिक व्यवहार होते का हे तपासायचे असल्याने त्यांना न्यायालयीन कोठडी सुनावण्यात आली आहे.