पुणे : आजचा दिवस ऐतिहासिक असून या परेडमध्ये प्रथमच महिलांच्या १७ छात्रांचा समावेश झाला. ऐतिहासिक घटनेमुळे ‘एनडीए’च्या इतिहासात एक नवीन पर्व सुरू झाले आहे. आजचा दिवस ‘एनडीए’साठी केवळ एक परेड नाही, तर लष्करी नेतृत्वाच्या गौरवशाली इतिहासातील एक नवा अध्याय आहे. एनडीएमध्ये ज्याप्रकारे प्रशिक्षण दिले जाते ते केवळ लष्करी अधिकारी नाही, तर जबाबदार व्यक्ती बनवते. अनेक शूरवीर सैनिकांनी देशासाठी आपले जीवन समर्पित केले आहे, असे प्रतिपादन माजी लष्करप्रमुख आणि मिझोरमचे राज्यपाल जनरल व्ही.के.सिंग यांनी केले.
एनडीएच्या खेत्रपाल मैदानावर पासिंग आऊट परेड दिमाखदार वातावरणात शुक्रवारी (दि.३०) पार पडला. यावेळी सिंग बोलत होते. दरम्यान अकादमी कॅडेट कॅप्टन उदयवीर सिंग नेगीने अत्यंत आत्मविश्वासाने संपूर्ण संचलनाचं नेतृत्व केलं. यावेळी माजी लष्करप्रमुख आणि मिझोरमचे राज्यपाल (निवृत्त) जनरल विजय कुमार सिंग , एअर व्हाइस मार्शल सरताज बेदी, एनडीएचे कमांडंट व्हाइस ॲडमिरल गुरुचरणसिंह, चीफ ऑफ इंटिग्रेटेड डिफेन्स स्टाफ एअर मार्शल आशुतोष दीक्षित, दक्षिण मुख्यालयाचे जनरल ऑफिसर कमांडन्ट लेफ्टनंट जनरल धीरज सेठ आदी उपस्थित होते.
सिंग म्हणाले, शारीरिक, मानसिकदृष्ट्या कणखर राहणे महत्त्वाचे आहे. आजच्या अधिकाऱ्यांनी नवीन तंत्रज्ञान आत्मसात करून त्यानुसार आपली आगामी काळात रणनीती आखावी कारण देशाचे भविष्य तुम्ही आहे. नवीन तंत्रज्ञान अभ्यास करून त्यात पारंगत व्हा. कारण त्यानुसारच पुढील कारवाई अवलंबून आहे. सायबर, कृत्रिम बुद्धिमत्ता आणि अवकाश सुरक्षा यांसारख्या नव्या क्षेत्रात बौद्धिकदृष्ट्या तल्लख आणि शारीरिकदृष्ट्या सक्षम असणे आवश्यक आहे. हिमालयाच्या शिखरांपासून ते अवकाशाच्या सीमांपर्यंत तुमच्या खांद्यावरच देशाचे रक्षण अवलंबून आहे.
पासिंग आऊट परेडमध्ये मित्र देशातील कॅडेट्सचा सहभाग
परेडमध्ये एकूण १३४१ कॅडेट्स सहभागी झाले होते. त्यापैकी ३३६ कॅडेट्स हे उत्तीर्ण झाले आहेत. यामध्ये थल सेना कॅडेट्स, नौदल कॅडेट्स आणि हवाईदल कॅडेट्सचा समावेश होता. तसेच मित्र देशातील भूतान, ताजिकिस्तान, श्रीलंका, म्यानमार, बांग्लादेश, मलेशिया, सुदान, टांझानिया, केनिया, झांबिया आणि मालदीव या देशातील कॅडेट्सचा समावेश होता. तर सध्या तिसऱ्या,चौथ्या आणि पाचव्या प्रशिक्षण कालावधीत असलेल्या महिला कॅडेट्सच्या तुकडीनेही परेडमध्ये भाग घेतला.