पुणे : ससून सर्वोपचार रुग्णालयात पुणे जिल्ह्यासह राज्यभरातून रुग्ण येतात. कर्करोगाच्या उपचारांसाठी ससून रुग्णालयात बाह्यरुग्ण विभाग सुरू झाला असला तरी कर्करोगासाठी प्रस्तावित असलेले स्वतंत्र रुग्णालय सहा वर्षांपासून रखडलेले आहे. जागेचा प्रश्न अद्याप न सुटल्याने कर्करोग रुग्णालयाला मुहूर्त कधी मिळणार, हा प्रश्न अद्याप अनुत्तरितच आहे.
कर्करोग रुग्णांना उपचार मिळणे आणखी सुलभ व्हावे, यासाठी पुण्यात शासकीय कर्करोग रुग्णालय उभारले जाण्याचा प्रस्ताव सात-आठ वर्षांपासून प्रलंबित आहे. सध्या ससून रुग्णालयात कर्करोगाच्या तपासण्या, शस्त्रक्रिया आणि केमोथेरपीचे उपचार केले जातात. मात्र, रेडिओथेरपीसारख्या सुविधा उपलब्ध नाहीत. कर्करोगाशी संबंधित सर्व अत्याधुनिक सुविधा एकाच छताखाली निर्माण व्हाव्यात, यासाठी २०१२ पासून प्रयत्न सुरू आहेत. मात्र, अद्याप कर्करोग रुग्णालयाचे स्वप्न प्रत्यक्षात उतरू शकलेले नाही.
शवाघराच्या समोरच्या जागा निश्चित करण्यासंबंधी चर्चा अजूनही सुरूच आहे. हा सव्वा दोन एकरचा भूखंड एमएसआरडीसीचा आहे, त्यांच्याशी जागेसंबंधी बोलणी सुरू आहेत. या भूखंडाच्या बदल्यात ससूनची येरवडा येथील मेंटल हेल्थ इन्स्टिट्यूटची जागा एमएसआरडीसीला देण्याबाबत बोलणी सुरू आहेत. मात्र, याबाबत शासनाकडे पाठपुरावा करूनही यश आलेले नाही, अशी माहिती ससूनमधील वरिष्ठ सूत्रांनी दिली.
--
कर्करोग रुग्णालयाबाबत जागेचा प्रश्न अद्याप सुटलेला नाही. रुग्णालय प्रशासनाकडून सातत्याने पाठपुरावा सुरू आहे.
- डॉ. मुरलीधर तांबे, अधिष्ठाता, ससून सर्वोपचार रुग्णालय