लोकमत न्यूज नेटवर्क
पुणे : शासनाच्या महिला व बालकल्याण विभागाने अंगणवाड्या हायटेक व पेपरलेस करण्यासाठी मोठा गाजावाज करत सर्व अंगणवाडी सेविकांना मोबाईल वाटप केले खरे, पण गेल्या दोन अडीच महिन्यांपासून सर्व अंगणवाडी सेविकांचे मोबाईल बंद पडले आहेत. परंतु रेकॉर्ड अपटेड ठेवण्यासाठी आता सर्व सेविकांना स्वखर्चांने रजिस्टर खरेदी करून माहिती भरावी लागत आहे.
शासनाने अंगणवाडी सेविकांना विविधी माहिती ऑनलाईन भरण्यासाठी मोबाईल हॅण्डसेट दिले होते. पुणे जिल्ह्यातील ४ हजार ३८८८ अंगणवाडी सेविकांना मोबाईल वाटप केले आहे. या मोबाईलमुळे खर तर अंगणवाडी सेविकांचे काम वाढले आहे. यात या मोबाईलवर दररोजची हजेरी भरणे, गृहभेटीची माहिती, लसीकरण आदी माहिती मोबाईल ॲपद्वारे भरावी लागते. परंतु गेल्या दोन अडीच महिन्यांपासून हे मोबाईल बंद पडले आहेत.
जिल्ह्यात एकूण अंगणवाडी : ४३८८
- मिनी अंगणवाड्या : ४४१
- अंगणवाडी सेविका : ३९४७
- मिनी अंगणवाडी सेविका : ४४१
- मोबाईल वाटप : ४३८८
--
मोबाईलवरून करावी लागतात ही सरकारी कामे
अंगणवाडी सेविकांना मोबाईल ॲपवर अंगणवाडीत येणाऱ्या सर्व मुलांची हजेरी भरणे, गरोदर माता, मुलांची माहिती देण्यासाठी वेळोवेळी गृहभेटी दिल्या जातात ही सर्व माहिती, पूरक पोषण आहाराची माहिती, लसीकरण सर्वांची माहिती मोबाईल ॲपवर भरावी लागते.
-------
मोबाईल ॲपवर अनेक अडचणी
मोबाईल दिल्यापासून अंगणवाडी सेविकांना अनेक अडचणी येत आहे. मोबाईल माहिती भरत असताना हॅग होणे, एकदा अर्जच डाऊनलोड न होणे यासारख्या अडचणी येत आहेत.
--
मोबाईल ॲप अद्ययावत करण्याचे काम सुरू
गेल्या काही दिवसांपासून मोबाईल ॲप अद्ययावत करण्याचे काम सुरू आहे. यामुळेच सध्या मोबाईलवर माहिती भरणे बंद आहे. संपूर्ण राज्यातच ही परिस्थिती आहे. शासनाकडून आदेश येतील तशी अंमलबजावणी सुरू होईल.
- दत्तात्रय मुंडे