शिरूरमध्ये १० व्हेंटिलेटर बेडचे कोविड हॉस्पिटल करा

---

शिरूर : शिरूर शहरात १०० ऑक्सिजन बेड व १० व्हेंटिलेटर बेडचे कोविड हॉस्पिटल सुरू करावे, अशी मागणी शिरूर शहरातील शिरूर शहर विकास आघाडी, राष्ट्रवादी काँग्रेस, शिवसेना, काँग्रेस आय या विविध संघटनांच्यावतीने जिल्हाधिकारी पुणे यांच्याकडे करण्यात आले आहे.

याबाबतचे निवेदन उपमुख्यमंत्री अजित पवार, गृहमंत्री दिलीपराव वळसे पाटील, खासदार डॉ. अमोल कोल्हे, शिरूरचे आमदार ॲड. अशोक पवार, शिरूर उपविभागीय अधिकारी संतोषकुमार देशमुख, तहसीलदार शिरूर लैला शेख यांना देण्यात आले आहे. या बाबत राष्ट्रवादी काँग्रेस लीगल सेलचे शहराध्यक्ष ॲड. रवींद्र खांडरे, यांनी माहिती दिली आहे.

कोविड १९ ची दुसऱ्या लाटेत शिरूर शहराला मोठा फटका बसला असून, १ एप्रिल ते आजपर्यंत सरासरी १५ ते ३० पेशंट दररोज कोरोना पॉझिटिव्ह निघत आहेत. साधारणपणे शहरात एका महिन्यात ५०० ते ९०० कोविड रुग्ण आढळून आलेले आहेत. ज्या प्रमाणात रुग्ण आढळतात त्या प्रमाणात त्यांना औषध व उपचार मिळत नाहीत. त्यांच्या विलगीकरणाची सोय केलेली आहे. परंतु रुग्णांना लागणारे ऑक्सिजन बेड फक्त ३० आहेत ते तोकडे पडतात. त्यामुळे शिरूर शहरातील अनेक लोकांना कोविड १९ च्या आजारामुळे वेळेवर ऑक्सिजन बेड व व्हेंटिलेटर बेड उपलब्ध न झाल्याने मृत्युमुखी पडावे लागलेले आहे.

शिरूर शहर पारनेर आणि श्रीगोंदा तालुक्याच्या सीमेवर असून त्या दोन तालुक्यांतील कोविड संसर्गाचे रुग्ण मोठ्या प्रमाणात शिरूरच्या खासगी व ग्रामीण रुग्णालयात उपचारासाठी येत असल्याने शिरूर शहरवासीयांना वेळेवर ऑक्सिजन बेड व व्हेंटिलेटर बेड उपलब्ध होत नाही. शिरूर शहरात मोठ्या प्रमाणावर मोलमजुरी करून उपजीविका करणारे गोरगरीब लोक असून, त्यांना खासगी रुग्णालयाचे बिल देणे अशक्य असते. त्यामुळे शिरूर शहरातील अनेक लोकांना कोविड १९ च्या आजारामुळे वेळेवर ऑक्सिजन बेड व व्हेंटिलेटर बेड उपलब्ध उपलब्ध न झालेले रुग्णांना मृत्युमुखी पडावे लागलेले आहे.

याबाबत राज्याचे मुख्यमंत्री उद्धव ठाकरे, उपमुख्यमंत्री अजित पवार व वैद्यकीय क्षेत्रातील तज्ज्ञ सल्लागारांनी कोविड १९ च्या तिसऱ्या लाटेच्या संदर्भात केलेल्या अंदाजामुळे मागण्यांचा अत्यंत गांभीर्यपूर्वक विचार करून त्वरित निर्णय घ्यावा, अशी मागणी विविध पक्षांच्या कार्यकर्त्यांनी केली असल्याची माहिती राष्ट्रवादी काँग्रेस लीगल सेलचे शहराध्यक्ष ॲड. रवींद्र खांडरे यांनी दिली.