ऊर्मिला मातोंडकर : प्रबोधन शतकोत्सव महोत्सवाचे उद्घाटन
ऊर्मिला मातोंडकर : ‘प्रबोधन’चा शतकोत्सव
लोकमत न्यूज नेटवर्क
पुणे : “प्रबोधन या शब्दाचा अर्थ आज दुर्दैवाने चुकीच्या अर्थाने वापरला जातो. मानसिक उद्बोधन म्हणजे प्रबोधन. यातून होणारी क्रांती असत्यावर, अन्यायावर घाव घालणारी असते. प्रबोधनकार ठाकरेंच्या विचारांचा वसा बाळगत तरुणाईला पुरोगामी महाराष्ट्र पुढे न्यायचा आहे. महाराष्ट्राची पुरोगामित्वाची वाटचाल अविरत सुरू ठेवावी लागेल,” असे विचार अभिनेत्री ऊर्मिला मातोंडकर यांनी व्यक्त केले
ज्येष्ठ समाजसुधारक प्रबोधनकार ठाकरे यांच्या संपादकत्वाखालील ‘प्रबोधन’ पाक्षिकाच्या शतकोत्सवानिमित्त संवाद पुणेतर्फे प्रबोधन महोत्सव घेण्यात आला. महोत्सवाचे उद्घाटन गुरुवारी (दि. २१) झाले. त्यावेळी मातोंडकर प्रमुख पाहुण्या म्हणून बोलत होत्या. विधान परिषदेच्या उपसभापती डॉ. नीलम गोऱ्हे, ज्येष्ठ सामाजिक कार्यकर्ते डॉ. बाबा आढाव, सूर्यदत्ता ग्रुप ऑफ इन्स्टिट्यूटचे डॉ. संजय चोरडिया, सीमा चोरडिया, संवाद पुणेचे सुनील महाजन, सचिन ईटकर, निकिता मोघे, किरण साळी, हरीश केंची आदी यावेळी उपस्थित होते.
आयुष्य कधीतरी सुवर्णसंधी देते, तर कधी निराशेच्या गर्तेत फेकते. यातून बाहेर कसे पडायचे, हे ‘माझी जीवनगाथा’ शिकवते. प्रबोधनकारांशिवाय महाराष्ट्राचा इतिहास पूर्ण होऊ शकत नाही, असे मातोंडकर यांनी सांगितले. डॉ. आढाव म्हणाले, “फुले-शाहू-आंबेडकर, सावित्रीच्या लेकी हे धागे म्हणजे एक विचारधारा आहे. विचारधारेतील धागे काळाच्या ओघात सुटता कामा नयेत. त्यासाठी प्रबोधनकारांच्या विचारांची गरज आहे. प्रबोधनकार हे सत्यशोधक होते.”
डॉ. गोऱ्हे म्हणाल्या, “शिवसेनेचे हिंदुत्व चातुर्वण्य व्यवस्थेचे समर्थन करणारे नाही; ते हिंदुत्व प्रबोधनकारी आहे. प्रबोधनकार ठाकरे यांच्या जाजवल्य आणि प्रखर विचारांना विविध प्रकारे धुमारे फुटत असतात. प्रबोधनाच्या जाणिवांचा नवा हुंकार निर्माण होण्याची गरज आहे.” स्वेच्छा विवाहाचा विषय अजूनही आपल्या समाजाने स्वीकारलेला नाही. त्यातून ‘ऑनरकिलिंग’च्या भयानक घटना घडतात. डिजिटल युगात अंधश्रद्धा, जातीयता नव्या मुखवट्यातून परत समोर येत आहेत. त्याचा सामना विचारांनी करायला हवा, याकडे डॉ. गोऱ्हे यांनी लक्ष वेधले. सुनील महाजन यांनी प्रास्ताविक केले. स्नेहल दामले यांनी सूत्रसंचालन केले. निकिता मोघे यांनी आभार मानले.