Leopard Attack : भय इथले संपत नाही..! २७ दिवसांत चौथा बिबट वनविभागाच्या ताब्यात

पिंजऱ्यात बिबट्या जेरबंद करण्यात ओतूर वनविभागाला यश आले, अशी माहिती वनपरिक्षेत्र अधिकारी कांबळे यांनी दिली.

ओतूर : जुन्नर तालुक्यातील कोपरे गाव परिसरात मागील काही दिवसांपासून बिबट्याच्या वावरामुळे नागरिकांमध्ये भीतीचे वातावरण निर्माण झाले होते. ग्रामस्थांच्या सततच्या मागणीनुसार कोपरे गावठाण हद्दीत वनविभागाच्या वतीने पिंजरा लावण्यात आला होता. अखेर बुधवार दि. २१ जानेवारी रोजी रात्री सुमारे १० वाजण्याच्या सुमारास या पिंजऱ्यात बिबट्या जेरबंद करण्यात ओतूर वनविभागाला यश आले, अशी माहिती वनपरिक्षेत्र अधिकारी चैतन्य कांबळे यांनी दिली.

बिबट्या पिंजऱ्यात अडकल्याची माहिती मिळताच वनपरिक्षेत्र अधिकारी चैतन्य कांबळे यांच्या मार्गदर्शनाखाली वनपाल सचिन मोढवे, वनरक्षक कोमल डाखोरे तसेच वनमजूर सुभाष डामसे यांनी तत्काळ घटनास्थळी धाव घेतली. परिस्थितीची पाहणी करून आवश्यक खबरदारी घेत बिबट्याला सुरक्षितरीत्या ताब्यात घेण्यात आले. त्यानंतर या बिबट्याला पुढील उपचार व निरीक्षणासाठी माणिकडोह येथील बिबट निवारा केंद्रात हलविण्यात आले.

वनविभागाच्या प्राथमिक तपासणीनुसार हा बिबट मादी असून, तिचे वय अंदाजे चार वर्षे असल्याचे सांगण्यात आले आहे. सध्या ती पूर्णपणे सुरक्षित असून, तिच्या प्रकृतीवर वनतज्ज्ञांचे बारकाईने लक्ष ठेवण्यात येत आहे. विशेष म्हणजे मागील २७ दिवसांच्या कालावधीत याच परिसरात वनविभागाने तब्बल चार बिबट्यांना जेरबंद करण्यात यश मिळवले आहे. त्यामुळे वनविभागाच्या सतर्कतेमुळे व त्वरित कारवाईमुळे नागरिकांनी सुटकेचा नि:श्वास सोडला असून, ग्रामस्थांनी वनविभागाच्या कार्याचे कौतुक केले आहे. भविष्यातही मानवी वस्ती आणि वन्यजीव यांच्यातील संघर्ष टाळण्यासाठी आवश्यक ती सर्व खबरदारी घेतली जाईल, असे आश्वासन वनविभागाच्या वतीने देण्यात आले आहे.