पुणे : वीटभट्टीसाठी लागणाऱ्या काेळशाच्या पावडरच्या आडून व फ्रुट पल्पच्या पॅकिंगच्या नावाखाली अवैध गाेवा बनावटीचे मद्य घेऊन जाणाऱ्या लक्झरी बसवर राज्य उत्पादन शुल्क विभागाने कारवाई केली. यावेळी १ कोटी २० लाख ३२ हजार रुपयांचा मुद्देमाल जप्त करण्यात आला असून, नऊ आरोपींना अटक करण्यात आली आहे. यावेळी एक्साईज विभागाने विदेशी मद्याच्या १ हजार ६६८ बाटल्या व पाच वाहने जप्त केली.
संशयित वाहनांची तपासणी करत असताना, गोवा बनावटी मद्याचे ३ बॉक्स राज्य उत्पादन शुल्क विभागाच्या सासवड पथकाला मिळाले. त्याच्याकडे चौकशीतून नसरापूर येथील एका पत्र्याचे शेडमध्ये छापा टाकला असता, तेथे एक जण ट्रकमधून गोवा बनावटी मद्याचे बॉक्स गाडीतून उतरून गोडाऊन मध्ये ठेवत होता. त्याला ताब्यात घेऊन शेडची तपासणी केली असता, ट्रकमध्ये वीटभट्टीसाठी लागणाऱ्या कोळशाची पावडर व गोवा बनावटीचे विविध ब्रांडच्या विदेशी मद्याचे बॉक्स, तसेच पत्र्याच्या शेडमध्ये थर्माकोलच्या बॉक्समध्ये गोवा बनावटीचे मद्य मिळून आले. हे मद्य थर्माकोलच्या बॉक्समध्ये पॅकिंग करून फ्रुट पल्पच्या नावाखाली गुजरात व इतरत्र पाठवण्यासाठी पॅकिंग केले जात असल्याचे आढळून आले. या ठिकाणाहून सहाचाकी ट्रक, गोवा बनावटीच्या विदेशी मद्याच्या १ हजार ७१० बाटल्या व इतर मुद्देमाल, असा ५१ लाख ९५ हजार १७० रुपयांचा माल जप्त करून चौघांना अटक केली आहे. ही कारवाई निरीक्षक एस. एस. बरगे, दुय्यम निरीक्षक पी. एम. मोहिते, एस. सी. शिंदे, संदीप मांडवेकर, जवान सुनील कुदळे, दत्तात्रय पिलावरे, अंकुश कांबळे, ऋतिक कोळपे, बाळू आढाव यांच्या पथकाने केली आहे.
दुसरी कारवाई निगडी येथील पवळे पुलाखाली भक्ती-शक्ती चौक येथे करण्यात आली. गोवा राज्यात विक्रीसाठी असलेले विदेशी मद्य व बिअर, असा एकूण १ लाख ३४ हजार २३० रुपयांचा मद्यसाठा एका खासगी कंपनीच्या लक्झरी बसमधून आणला जात होता. बस चालकाला ताब्यात घेऊन हा साठा जप्त करण्यात आला. हा मद्यसाठा खडकी औंध रोडवरील खडकी स्टेशनजवळ वितरीत करण्यात येणार होता. यावेळी ५ आरोपींना ताब्यात घेण्यात आले. त्यासोबतच २ दुचाकी वाहने व एक सहाचाकी बस जप्त करण्यात आली. या ठिकाणी विदेशी दारूच्या १२६ बाटल्या, बिअरच्या २४ बाटल्या, असा एकूण ६८ लाख ३७ हजार ७३० रुपयांचा माल जप्त करण्यात आला आहे. राज्य उत्पादन शुल्क विभागाचे विभागीय उपायुक्त सांगर धोमकर, उपअधीक्षक संतोष जगदाळे यांच्या मार्गदर्शनाखाली ही कारवाई करण्यात आली. या दोन्ही गुन्ह्यांत मिळून एकूण १ कोटी २० लाख ३२ हजार ९०० रुपयांचा माल जप्त करण्यात आला आहे. यात एकूण ९ आरोपींना अटक करण्यात आली.