इंदापूरला शासकीय आरोग्यसेवेची कोंडी; रिक्त पदे, अपूर्ण कामांमुळे रुग्णांना फटका

- अत्याधुनिक सुविधा असूनही सेवा मर्यादित; बावडा रुग्णालयावर विभागांतील वादाचा परिणाम

- शैलेश काटे

इंदापूर : इंदापूर तालुक्यात शासकीय आरोग्य यंत्रणेकडे अत्याधुनिक तपासणी साहित्य आणि सुविधा उपलब्ध असतानाही रिक्त पदे, अपूर्ण कामे आणि आरोग्य विभाग व सार्वजनिक बांधकाम विभाग यांच्यातील समन्वयाच्या अभावामुळे ग्रामीण भागातील रुग्णांना समाधानकारक सेवा मिळण्यात अडचणी येत असल्याचे चित्र समोर आले आहे.

वाढत्या लोकसंख्येच्या पार्श्वभूमीवर तालुक्यात आणखी १६ उपकेंद्रांची आवश्यकता असल्याचे आरोग्य विभागाने स्पष्ट केले आहे. ग्रामीण भागातील नागरिकांना महागड्या खासगी उपचारांचा पर्याय स्वीकारावा लागू नये, यासाठी शासकीय रुग्णालयांमध्ये अधिक सुविधा उपलब्ध करून देण्याचा प्रयत्न सुरू असल्याचेही सांगण्यात येते. प्रशासनाकडून तालुक्यात इंदापूर शहरात उपजिल्हा शासकीय रुग्णालय, बावडा, निमगाव केतकी व भिगवण येथे ग्रामीण रुग्णालये तर सणसर, लासुर्णे, लोणी-देवकर, अंथुर्णे, बेलवाडी, वालचंदनगर (जंक्शन) व काझड यांसह दहा ठिकाणी प्राथमिक आरोग्य केंद्रे कार्यरत आहेत. लाखेवाडी येथे नवीन प्राथमिक आरोग्य केंद्र मंजूर झाले असून, तालुक्यात सध्या ४६ उपकेंद्रे आहेत. निमगाव केतकी ग्रामीण रुग्णालयात लसीकरण व माता-बालसंगोपन सेवांवर भर दिला जातो. 

बावडा ग्रामीण रुग्णालय वादात

बावडा येथील साठ खाटांच्या ग्रामीण रुग्णालयात क्ष-किरण विभाग, व्हेंटिलेटर, ऑक्सिजन सुविधा व अतिदक्षता विभाग अशी अत्याधुनिक साधने उपलब्ध असली तरी आरोग्य विभाग व सार्वजनिक बांधकाम विभाग यांच्यातील तांत्रिक वादामुळे अनेक दुरुस्तीची कामे प्रलंबित आहेत. छताची गळती, ऑक्सिजन प्लांट बंद, स्वच्छतागृहांची दुरवस्था आणि फायर अलार्म नसणे अशा समस्यांकडे आरोग्य विभागाने लक्ष वेधले आहे. गेल्या सात वर्षांत ३७ वेळा स्मरणपत्रे देण्यात आली असली तरी कामे न झाल्याने बावडा व आसपासच्या ३० ते ४० गावांतील रुग्णांना त्रास होत असल्याची तक्रार नागरिकांकडून होत आहे.  

आरोग्य केंद्र उपयुक्त

लोणी-देवकर औद्योगिकपरिसरातील कामगारांसाठी तेथील प्राथमिक आरोग्य केंद्र उपयुक्त ठरत आहे. प्राथमिक आरोग्य केंद्रांमध्ये रक्त तपासण्या, बाह्य व आंतररुग्ण सेवा तसेच गरोदर महिलांचे लसीकरण मोफत दिले जाते.  

उपजिल्हा रुग्णालयात येते पावसाचे पाणी

इंदापूर शहरातील उपजिल्हा शासकीय रुग्णालय हे तालुक्यातील सर्वात मोठे रुग्णालय असून, येथे मोफत डायलिसिस, सिटीस्कॅन, गरोदर मातांची सोनोग्राफी, विविध कर्करोग तपासण्या तसेच हाडांच्या शस्त्रक्रिया अशा सुविधा उपलब्ध आहेत. मात्र रुग्णालय सखल भागात असल्याने पावसाळ्यात रस्त्यावरून येणारे पाणी तळमजल्यात साचते.
संरक्षण भिंत, प्रवेशद्वार आणि शवविच्छेदन गृहाचे काम अपूर्ण असून, या कामांसाठी सुमारे दीड कोटी रुपयांची गरज असल्याचे सांगितले जाते. रुग्णालय प्रशासन गेल्या सहा महिन्यांपासून सार्वजनिक बांधकाम विभागाकडे पाठपुरावा करत आहे. पावसाळ्यापूर्वी ही कामे पूर्ण होण्याची अपेक्षा व्यक्त केली जात आहे.

तालुक्यात ८५ पदे रिक्त

इंदापूर तालुक्यातील आरोग्यसेवेचा मोठा भार मर्यादित कर्मचाऱ्यांवर पडत आहे. एकूण २६० मंजूर पदांपैकी ८५ पदे रिक्त आहेत. आरोग्यसेविका, आरोग्यसेवक आणि वैद्यकीय अधिकाऱ्यांच्या पदांमध्ये मोठ्या प्रमाणात रिक्तता असल्याचे आकडेवारीतून स्पष्ट झाले आहे.

तालुका आरोग्य अधिकारी डॉ. सुरेखा पोळ यांनी सांगितले की, प्राथमिक आरोग्य केंद्रांमध्ये गेल्या दोन वर्षात ४७० महिलांची प्रसूती झाली आहे. वाढत्या लोकसंख्येच्या पार्श्वभूमीवर तालुक्यात आणखी १६ उपकेंद्रांची आवश्यकता आहे.

तालुक्यातील आरोग्य सुविधा सक्षम करण्यासाठी निधी उपलब्ध करून देण्याबाबत लोकप्रतिनिधींनी एकत्रितपणे प्रयत्न करावेत, अशी अपेक्षा नागरिकांकडून व्यक्त होत आहे.