दुबईतील यंत्रणा सतर्क! ड्रोन-मिसाईल हवेतच नष्ट, दैनंदिन जीवन पूर्ववत, मराठी युवकाने सांगितला अनुभव

काही वेळा ड्रोन किंवा मिसाईल हल्ल्याचा धोका निर्माण होतो; मात्र दुबई सरकारची सुरक्षा यंत्रणा अत्यंत सतर्क असल्याने ड्रोन किंवा मिसाईल हवेतच नष्ट केले जातात

पांडुरंग मरगजे

धनकवडी (पुणे) : मध्यपूर्वेतील तणावाच्या पार्श्वभूमीवर टीव्ही आणि सोशल मीडियावर दाखवली जाणारी परिस्थिती आणि प्रत्यक्ष दुबईतील वास्तव यात फरक असल्याचे दुबईत नोकरीनिमित्त राहत असलेल्या मराठी तरुण आशिष वीर यांनी ‘लोकमत’शी बोलताना स्पष्ट केले. ड्रोन-मिसाईल हवेतच निष्प्रभ केले जात असून सध्या दुबईतील दैनंदिन जीवन जवळपास पूर्ववत सुरू असल्याचे त्यांनी सांगितले. दुबईतील आपल्या मुला-मुलींची भारतातील आई-वडिलांनी काळजी करू नये असे भावनिक आवाहनही त्यांनी केले.

गेल्या साडेतीन वर्षांपासून इमिरेट्स एअरलाइन्स या विमान कंपनीमध्ये कार्यरत आशिष वीर यांनी सांगितले की, काही वेळा ड्रोन किंवा मिसाईल हल्ल्याचा धोका निर्माण होतो; मात्र दुबई सरकारची सुरक्षा यंत्रणा अत्यंत सतर्क आहे. अशा प्रकारचे ड्रोन किंवा मिसाईल हवेतच नष्ट केले जातात. त्यामुळे ते जमिनीवर किंवा इमारतींवर आदळण्यापूर्वीच धोका टळतो. हल्ल्यात जीवितहानी झाल्याचे प्रकार आढळत नाहीत.

संयुक्त अरब अमिराती सरकार नागरिक, पर्यटक आणि परदेशी कामगारांची अत्यंत काळजी घेत असल्याचेही वीर यांनी नमूद केले. शहरातील दैनंदिन जीवन जवळपास पूर्वीसारखेच सुरू असून लोक कामावर जात आहेत. इराण हल्ल्याच्या सुरुवातीचे दोन दिवस सावधगिरी बाळगण्यात आली; मात्र तिसऱ्या दिवसापासून परिस्थिती नियंत्रणात आली असल्याचे त्यांनी सांगितले.

डॉक्टर व समुपदेशनाचीही सुविधा

सुरक्षेच्या दृष्टीने कोणताही संभाव्य धोका आढळल्यास प्रत्येक नागरिकाच्या मोबाईलवर इमर्जन्सी अलर्ट पाठवला जातो. धोका टळल्यानंतर ‘थँक यू फॉर युवर कोऑपरेशन’ असा संदेश देत लोकांना पुन्हा दैनंदिन कामे सुरू करण्याचे आवाहन केले जाते. काही विमानसेवा टप्प्याटप्प्याने पुन्हा सुरू करण्याचा प्रयत्न सुरू असून, बाहेरच्या प्रवाशांना सुरक्षितरीत्या त्यांच्या देशात पाठवण्याचे प्रयत्न होत आहेत. शाळाही सध्या ऑनलाइन पद्धतीने सुरू आहेत. लहान मुलांवर मानसिक ताण येऊ नये यासाठी समुपदेशन सत्रांची व्यवस्था करण्यात आली असून गरज भासल्यास डॉक्टर व समुपदेशनाचीही सुविधा उपलब्ध करून देण्यात आली आहे.

कृतज्ञतेचा भावनिक निरोप

भारताकडे परतताना दुबई आंतरराष्ट्रीय विमानतळावर तीन वर्षांच्या तनिष्का वीर हिने फलकावरून दुबई प्रशासनाचे आभार मानले. प्रादेशिक तणावाच्या काळातही सुरक्षितता आणि नम्र वागणूक दिल्याबद्दल तिने कृतज्ञता व्यक्त केली. दुबईतील प्रेमळ वातावरण आणि सुरक्षित अनुभव आयुष्यभर लक्षात राहील, अशी भावना तिने व्यक्त केली.