आळेफाटा येथील सोसायटीत होतेय टँकरमधून डिझेलची तस्करी

- आळेफाटा परिसरात राजरोसपणे डिझेलची तस्करी होत असल्याचे समोर आले आहे.

आळेफाटा : पेट्रोल-डिझेलच्या दराने उच्चांक गाठलेला असताना आळेफाटा येथे एका सोसायटीच्या आवारात गुरुवारी (१२ जून) रात्री जीओ लोगो असलेल्या डिझेलचे टँकर व एचपी लोगो असलेला कंत्राटदाराचा छोटा टँकर एकमेकांत डिझेल बदली करून भरीत असतानाचा व्हिडीओ सोशल मीडियावर व्हायरल झाल्याने एकच खळबळ उडाली. आळेफाटा परिसरात राजरोसपणे डिझेलची तस्करी होत असल्याचे समोर आले आहे.

याप्रकणी पुरवठा विभाच्या अधिकाऱ्यांनी चौकशी करीत आळेफाटा येथील एकाविरोधात गुन्हा दाखल केला आहे. हे वापरण्यास बंदी असलेले केमिकलयुक्त डिझेल किंवा बायोडिझेल असल्याची चर्चा आहे. अवघ्या ७८ रुपये प्रतिलिटर दराने हे डिझेल ठेकेदार आणि ट्रकचालकांना विकले जात आहे. या तस्करीमुळे शासनाचा मोठा महसूल बुडत असून, आळेफाटा पोलिस ठाण्याच्या हद्दीत डिझेल तस्करीचे रॅकेट सक्रिय असल्याचे समोर आले आहे.

आळेफाटा परिसरातील नगर-कल्याण महामार्गावर असलेल्या सिद्धिविनायक सोसायटीतील पार्किंगमध्ये तस्कर जीओ व एचपी लोगो असलेल्या एका डिझेल टँकरमधून दुसऱ्या डिझेल टँकरमध्ये डिझेल भरत असतानाचा व्हिडीओ सोशल मीडियावर गुरुवारी व्हायरल झाला. त्यानंतर आळेफाटा पोलिसांना याबाबत स्थानिकांनी माहिती दिली. संबंधित आरोपी यांनी ज्वलनशील पेट्रोलियम पदार्थ निवासस्थानी ठेवण्यास प्रतिबंध असताना देखील अंदाजे पन्नास लिटर डिझेलची साठवणूक त्यांचे निवासस्थानातील स्टोअर रूममध्ये साठवून ठेवल्याचे पोलिस तपासात निदर्शनास आले आहे. त्यानुसार त्यांनी जीवनावश्यक वस्तू कायदा १९५५ च्या कलम ३ नुसार येत असलेल्या मोटार स्पिरीट/ हाय स्पीड डिझेल नियंत्रण आदेश २००५ यातील तरतुदीचे तसेच जीवनावश्यक वस्तू कायदा १९५५ च्या कलम ७ चे उल्लंघन केल्याचे प्रथमदर्शनी दिसून आले.

दरम्यान, पुरवठा निरीक्षण अधिकारी श्रीमती माधुरी बबनराव संतोषवार यांनी अधिकची चौकशी करत राजेंद्र श्रीपत कुऱ्हाडे (वय ६०, रा. सिद्धिविनायक सोसायटी, आळेफाटा, ता. जुन्नर, जि. पुणे) याच्याविरुद्ध जीवनावश्क वस्तू कायदा १९५५ च्या कलम ३ व ७ प्रमाणे शुक्रवार (१४ जून) रोजी रात्री उशिरा गुन्हा दाखल केला.