पुण्यात सायबर चोरट्यांचा धुमाकूळ; शहरातील वेगवगेळ्या ४ घटनांमध्ये चौघांना ४३ लाखांना फसवले

शेअर ट्रेडिंगमध्ये गुंतवणूक केल्यास जास्त परतावा मिळेल, असे आमिष दाखवून फसवणूक केल्याची माहिती समोर आली आहे

पुणे: सायबर चोरांनी वेगवेगळ्या चार घटनांमध्ये चौघांची ४३ लाख १७ हजार ६४८ रुपयांची फसवणूक केली. या प्रकरणी संबंधित पोलिस ठाण्यांत सायबर चोरांविरोधात गुन्हे दाखल करण्यात आले आहेत. शिवणे परिसरातील ३५ वर्षीय तरुणाला १ ते २८ ऑक्टोबर या कालावधीत सायबर चोरांनी संपर्क साधून शेअर ट्रेडिंगमध्ये गुंतवणूक केल्यास भरघोस नफा कमवू शकता, असे आमिष दाखवले. त्या आमिषाला बळी पडत तरुणाने एका ॲपमार्फत ८ लाख ५७ हजार ५०० रुपये गुंतवले. त्यानंतर तरुणाला कोणताही परतावा अथवा मूळ रक्कम परत न मिळाल्याने आपली फसवणूक झाल्याचे लक्षात आले.

या प्रकरणी नुकताच उत्तमनगर पोलिस ठाण्यात गुन्हा दाखल करण्यात आला आहे. अशाचप्रकारे बोपोडी येथील ५५ वर्षीय व्यक्तीला ८ जुलै ते २४ सप्टेंबर या कालावधीत सायबर चोरांनी संपर्क साधत शेअर ट्रेडिंगमध्ये गुंतवणूक केल्यास जास्त परतावा मिळेल, असे आमिष दाखवले. तक्रारदाराने ११ लाख १२ हजार ४४८ रुपयांची गुंतवणूक केल्यानंतर त्यांना कोणताही परतावा अथवा मूळ रक्कम परत न मिळाल्याने खडकी पोलिस ठाण्यात गुन्हा दाखल करण्यात आला आहे. पुढील तपास पोलिस निरीक्षक (गुन्हे) किरण गायकवाड करत आहेत.

तिसऱ्या घटनेत मगरपट्टा सिटी येथील ४९ वर्षीय महिलेला ८ एप्रिल ते ८ मे या कालावधीत सायबर चोरांनी सोशल मीडियावरील ॲडद्वारे शेअर्स आणि आयपी ओट्रेडिंगचे प्रॉफिट मिळेल, असे सांगत २० लाख ५२ हजार रुपये गुंतवण्यास भाग पाडले. त्यानंतर महिलेला कोणताही परतावा न मिळाल्याने फसवणूक झाल्याचे लक्षात येताच त्यांनी हडपसर पोलिस ठाण्यात तक्रार दिली. पुढील तपास पोलिस निरीक्षक जगदाळे करत आहेत. 

चौथ्या घटनेत कोंढव्यातील ५७ वर्षीय व्यक्तीला सायबर चोरांनी २२ ते २८ सप्टेंबर दरम्यान संपर्क साधून शेअर मार्केटमध्ये पैसे गुंतवल्यास जादा परतावा मिळेल, असे आमिष दाखवले. तक्रारदाराने त्यावर विश्वास ठेवत २ लाख ९५ हजार ७०० रुपयांची गुंतवणूक केली. त्यानंतर सायबर चोरांनी कोणताही परतावा अथवा मूळ रक्कम परत न दिल्याने त्यांनी कोंढवा पोलिस ठाण्यात तक्रार दिली. पुढील तपास पोलिस उपनिरीक्षक खराडे करत आहेत.