बारामती : बारामती शहरातील तुळजाराम चतुरचंद महाविद्यालयातील बारावीत शिकणाऱ्या अल्पवयीन विद्यार्थ्याचा खून झाल्याचा धक्कादायक प्रकार सोमवारी (दि ३०) सकाळी घडला. या घटनेनंतर शहरात खळबळ उडाली आहे. कोयत्याने वार करुन याचा खून करण्यात आला आहे.
एकाच वर्गात शिकणाऱ्या विद्यार्थ्यांनी हा खून केल्याचे समोर आले आहे. याप्रकरणी पोलिसांनी एका आरोपीला अटक केली असून दुसरा फरार आहे. पोलिसांनी तातडीने महाविद्यालयाचा परिसर ‘सील’ केला आहे. या परिसरात मोठा पोलीस बंदोबस्त ठेवण्यात आला आहे. खून झालेल्या विद्यार्थ्याला उपचारासाठी शहरातील सिल्व्हर ज्युबली रुग्णालयात रक्ताने माखलेल्या अवस्थेत आणण्यात आले. मात्र, तत्पुर्वीच त्याचा मृत्यू झाल्याचे सूत्रांनी सांगितले. दरम्यान, पोलीस अधिकारी घटनास्थळी पोहचले आहेत. पोलिसांनी तातडीने सुत्र हलवत तपास सुरु केला आहे. हा विद्यार्थी मुळचा बाहेरील तालुक्यातील असून तो शिक्षणासाठी बारामती शहरात आल्याचे समजते. याबाबत अप्पर पोलीस अधीक्षक गणेश बिरादर यांनी ‘लोकमत’शी बोलताना सांगितले की, एक महिन्यापूर्वी दुचाकीला ‘कट’ मारण्याच्या वादातून हा प्रकार घडल्याची प्राथमिक माहिती पोलीस तपासात निष्पन्न झाली. दोन अल्पवयीन विद्यार्थ्यांनी हा खून केला आहे.